وفاقی وزیر داخلہ محسن نقوی نے دبئی میں منعقدہ ورلڈ گورنمنٹس سمٹ میں شرکت کی، جہاں انہوں نے متحدہ عرب امارات کے نائب وزیر اعظم و وزیر داخلہ لیفٹیننٹ جنرل شیخ سیف بن زید النہیان اور روانڈا کے وزیر داخلہ ڈاکٹر ونسنٹ بیروٹا سے اہم ملاقاتیں کیں۔
ملاقاتوں میں دوطرفہ تعلقات کو مضبوط بنانے، سیکیورٹی تعاون بڑھانے اور آن لائن دہشت گردی اور دہشت گردی کی مالی معاونت کی روک تھام کے لیے مشترکہ حکمت عملی تیار کرنے پر تبادلہ خیال کیا گیا۔پاک–یو اے ای وزرائے داخلہ کی ملاقات میں دونوں ممالک نے دوطرفہ تعلقات کو مزید مستحکم کرنے اور باہمی مفادات کے شعبوں میں تعاون بڑھانے کا اعادہ کیا۔ اس موقع پر وفاقی وزیر داخلہ نے کہا کہ متحدہ عرب امارات کے جدید پولیسنگ نظام سے عملی استفادہ کے لیے ایکسچینج پروگرامز انتہائی فائدہ مند ثابت ہو سکتے ہیں۔ ملاقات میں آن لائن دہشت گردی اور مالی معاونت کی روک تھام کے لیے مشترکہ حکمت عملی مرتب کرنے پر بھی اتفاق کیا گیا۔
وفاقی وزیر داخلہ اور روانڈا کے وزیر داخلہ کے درمیان ملاقات میں دوطرفہ تعلقات، سیکیورٹی تعاون اور مشترکہ مفادات کے شعبوں میں اشتراک کار بڑھانے پر تفصیلی تبادلہ خیال ہوا۔ دونوں رہنماؤں نے وزارت داخلہ کے درمیان کوآرڈینیشن بہتر بنانے کے لیے فوکل پرسن مقرر کرنے پر اتفاق کیا۔ اس موقع پر روانڈا کے وزیر داخلہ نے کہا کہ وہ پاکستان کے اداروں کے ساتھ اشتراک کار بڑھانے کے خواہاں ہیں تاکہ سیکیورٹی اور گورننس کے شعبوں میں ایک دوسرے کے تجربات سے فائدہ اٹھایا جا سکے۔
اس سے قبل وزیر داخلہ محسن نقوی نے اے سی سی (اینٹی کرپشن کمیٹی) کے ہیڈکوارٹر کا دورہ بھی کیا اور وہاں جاری منصوبوں اور انتظامی امور کا جائزہ لیا۔
