دہشت گردی کیخلاف جنگ میں حکومت اور فوج ایک پیج پر ہیں سہیل آفریدی

صوبہ خیبر پختونخوا  کی  حکومت اپنے تمام تر وسائل ‘ فوج ، پولیس ، سی ٹی ڈی اور دیگر اداروں کو استعمال کرتے ہوئے کسی قربانی سے دریغ نہیں کرے گی
 دہشت گردی کے خلاف جنگ ہم سب کی مشترکہ  ہے ، اس کو مشترکہ کوششوں سے ہی جیتا جا سکتا ہے:وزیر اعلی کی صوبائی اپیکس کمیٹی اجلاس  میں گفتگو 
پشاور(آئی این پی )وزیراعلی خیبر پختونخوا سہیل آفریدی نے کہا ہے  دہشت گردی کے خلاف جنگ ہم سب کی مشترکہ ہے، اس کے لیے سول حکومت، انتظامیہ ، پاک فوج  اور دیگر قانون نافذ کرنے والے ادارے ا یک پیج پر ہیں اور مل کر کوششیں جاری رکھیں گے‘ یہ ہم سب کی مشترکہ جنگ ہے ، اس کو مشترکہ کوششوں سے ہی جیتا جا سکتا ہے۔پریس سیکریٹری برائے وزیر اعلی خیبر پختونخوا کے دفتر  سے جاری اعلامیے کے مطابق وزیراعلی خیبرپختونخوا سہیل آفریدی کی زیر صدارت صوبائی اپیکس کمیٹی کا اہم اجلاس ہوا۔ اعلامیے کے مطابق اجلاس نے فیصلہ کیا کہ دہشت گردی کے خلاف جامع   پالیسی کی کامیابی کے لئے  تمام  سیاسی جماعتوں ، عوامی نمائندوں ، معززین اور  وفاقی حکومت کی مشترکہ مشاورت، باہمی تعاون اور عملی ہم آہنگی ضروری ہے۔اس ضمن میں اجلاس میں  مصمم ارادہ کیا گیا  صوبہ خیبر پختونخوا  کی  حکومت اپنے تمام تر وسائل بشمول فوج ، پولیس ، سی ٹی ڈی اور دیگر اداروں کو استعمال کرتے ہوئے کسی قربانی سے دریغ نہیں کرے گی۔بیان کے مطابق یہ طویل میعادی حکمت عملی  دہشت گردی کے تمام محرکات کی نشاندہی، اِن کا خاتمہ اور اِس کے نتیجے میں عوامی اعتماد کی بحالی کو یقینی بنائے گی تاکہ حکومت اور عوام یکجا ہوکر ملکی سلامتی اور ترقی کو یقینی بنائیں۔حکومت خیبر پختونخوا کا ایجنڈا یہ ہے کہ بہتر  طرز حکمرانی اور عوامی مفاد ہی دہشت گردی کے خلاف قوم کو یکجا کرسکتا ہے۔فورم نے فیصلہ کیا کہ پائیدار استحکام کے لیے جن علاقوں سے عارضی نقل مکانی کی گئی ، حکومت اس عمل کے دوران متاثرہ افراد کی مکمل دیکھ بھال، بحالی اور بنیادی ضروریات کی فراہمی کو یقینی بنائے گی، تاکہ یہ عارضی مشکل مستقبل میں امن، ترقی اور خوشحالی کی بنیاد بن سکے، اِن کی باعزت واپسی حکومت کی اولین ترجیح ہے۔وزیراعلی خیبر پختونخوا نے کہا کہ امن ہماری اولین ترجیح ہے، اس پر سمجھوتہ نہیں کیا جائے گا