وزیر اعلیٰ پنجاب مریم نواز نے پنجاب کے ساتھ دیگر صوبوں کے طلبہ کے لیے بھی "ہونہار اسکالرشپ اسکیم" کی منظوری دے دی، جس کے تحت تمام صوبوں کے طلبہ کے لیے یکساں اہلیت کا معیار مقرر کیا گیا ہے۔
لیپ ٹاپ اسکیم میں توسیع
اجلاس کے دوران وزیرِ اعلیٰ نے پنجاب میں طلبہ کے لیے لیپ ٹاپ اسکیم کو مزید وسعت دیتے ہوئے لیپ ٹاپ کی تعداد بڑھا کر 1 لاکھ 10 ہزار کرنے کی ہدایت کی۔ پنجاب میں لیپ ٹاپ حاصل کرنے کے لیے کم از کم 65 فیصد نمبر حاصل کرنا لازمی ہوگا۔
دیگر صوبوں کے طلبہ کے لیے مواقع
مریم نواز نے آزاد کشمیر، گلگت بلتستان، بلوچستان، خیبرپختونخوا اور دیگر صوبوں کے طلبہ کے لیے بھی اسکالرشپ اسکیم کی توسیع کی منظوری دی۔ ان علاقوں کے طلبہ کے لیے بھی پنجاب کی طرح یکساں اہلیت کا معیار مقرر کیا گیا ہے۔
طلبہ کے لیے ہیلپ لائن اور مالی امداد
اجلاس میں طلبہ کے لیے خصوصی ہیلپ لائن قائم کرنے کی ہدایت کی گئی تاکہ طلبہ کسی بھی مسئلے کی صورت میں فوری مدد حاصل کر سکیں۔ وزیر اعلیٰ نے اعلان کیا کہ میرٹ پر آنے والے ہر طالب علم کی فیس حکومت ادا کرے گی، اور تعلیم کے لیے فنڈز کی فراہمی میں کسی قسم کی رکاوٹ نہیں آنے دی جائے گی۔
تعلیم پر سرمایہ کاری— مریم نواز کا ویژن
مریم نواز نے کہا کہ تعلیم اور یوتھ قوم کی اصل سرمایہ کاری ہیں۔ انہوں نے مزید کہا:"دل چاہتا ہے کہ ہر بچے کو لیپ ٹاپ ملے، کیونکہ یہ ان کا حق ہے۔ ہم ہر بچے کی قسمت بدلنے کے خواہشمند ہیں۔"
دیگر تعلیمی اقدامات
اجلاس میں پنجاب میں ایک روزہ وائس چانسلرز کانفرنس اور ٹیک ایکسپو کے انعقاد کی منظوری بھی دی گئی تاکہ تعلیمی میدان میں ترقی کو مزید فروغ دیا جا سکے۔
