طالبان حکومت نے افغانستان میں خانہ جنگی کے امکان کو مسترد کر دیا

 دشمنوں کی جانب سے تقسیم پیدا کرنے کی کوششوں کے باوجود حکمران متحد رہیں گے، ترجمان ذبیح اللہ مجاہد
  کابل (آئی این پی )افغانستان کے ایک ترجمان نے کہا ہے کہ دشمنوں کی جانب سے تحریک کے رہنمائوں اور عوام کے درمیان تقسیم پیدا کرنے کی کوششوں کے باوجود افغانستان کے طالبان حکمران متحد رہیں گے۔ برطانوی خبر رساں ادار ے کے مطابق جنوبی شہر قندھارسے تعلق رکھنے والے ترجمان ذبیح اللہ مجاہد نے ایکس پر کہا کہ دشمنوں نے امارت اسلامیہ افغانستان میں تقسیم کے بیج بونے کا خواب دیکھا تھا۔انہوں نے کہا کہ اسے محض ایک وہم سمجھیں، امارات اسلامی افغانستان ایک متحدہ محاذ ہے، اور یہ نظام اتحاد کا نتیجہ ہے، اتحاد کے بغیر، کچھ بھی موجود نہیں ہوگا۔ذبیح اللہ مجاہد نے کہا کہ بعض اوقات اختلاف رائے کے باوجود طالبان رہنمائوں کے درمیان کوئی تنازع نہیں ہے، یہ بحثیں کبھی کبھی عوامی ہو جاتی ہیں، لیکن اسے کبھی بھی تقسیم کے طور پر غلط نہیں سمجھا جانا چاہیے۔آخر کار، وہ ایک فیصلے کے تحت متحد ہوجاتے ہیں، اس کا مطلب یہ نہیں ہے کہ وہ ایک دوسرے کے خلاف اٹھ کھڑے ہوں، ایک دوسرے کو نقصان پہنچائیں، یا تنازعات اور جنگ میں مشغول ہوجائیں۔