بالی ووڈ کے سپر اسٹار شاہ رُخ خان اور اداکارہ کاجول نے لندن کے لیسٹر اسکوائر میں اپنی مشہور فلم ”دل والے دلہنیا لے جائیں گے“ کے مرکزی کردار راج اور سمرن کے لائف سائز برانز مجسمے کی نقاب کشائی کی۔
اس خصوصی تقریب کا مقصد ادیتیہ چوپڑا کی کلاسک فلم کی 30ویں سالگرہ منانا اور اس کے عالمی اثرات کو خراجِ تحسین پیش کرنا تھا۔اس موقع پر دونوں اداکاروں نے اپنے مجسموں کے ساتھ تصاویر بنوائیں اور مداحوں کو حیرت میں مبتلا کر دیا، جیسا کہ سوشل میڈیا پر ان کی تصاویر اور ویڈیوز وائرل ہوگئیں۔ شاہ رُخ خان نے اپنی انسٹاگرام پوسٹ میں اپنی خوشی کا اظہار کیا اور کہا کہ لندن میں راج اور سمرن کا مجسمہ دیکھ کر وہ بہت خوش ہیں۔ انہوں نے فلم کی مشہور لائن ”بڑے بڑے دیشوں میں ایسی چھوٹی چھوٹی باتیں ہوتی رہتی ہیں، سینیورٹا!“ کا ذکر بھی کیا۔شاہ رُخ خان نے کہا کہ یہ بھارتی فلم کا پہلا مجسمہ ہے جو ”سینز ان دی سکوائر“ ٹریل کا حصہ ہے، اور برطانیہ کے عوام کا شکریہ ادا کیا جنہوں نے یہ ممکن بنایا۔
انہوں نے مداحوں کو دعوت دی کہ جب بھی لندن آئیں، تو راج اور سمرن کے مجسموں کے ساتھ تصاویر ضرور بنوائیں تاکہ اس فلم کے یادگار لمحوں کو تازہ کیا جا سکے۔لندن کے سینز ان دی سکوائر میں دنیا بھر کی مشہور فلموں کے کرداروں کے مجسمے نصب ہیں، جن میں ہیری پوٹر، مسٹر بین، بریجٹ جونز، مریم پاپنس، اور بیٹ مین کے مجسمے شامل ہیں۔ یہ جگہیں اُن مقامات سے منسلک ہیں جہاں سے مشہور فلمی مناظر شوٹ ہوئے، اور یہ مجسمے فلمی تاریخ کے اہم لمحوں کی یاد دلاتے ہیں۔
