امریکی دارالحکومت واشنگٹن میں اس وقت سنسنی پھیل گئی جب وائٹ ہاؤس کے قریب فائرنگ کے واقعے کے بعد اچانک لاک ڈاؤن نافذ کیا گیا۔
امریکی خفیہ ایجنسی نے فوری کارروائی کرتے ہوئے وائٹ ہاؤس کے نارتھ لان میں موجود صحافیوں کو اندر جانے کی ہدایت دے دی اور پورے علاقے کو سیکیورٹی حصار میں لے لیا۔ حکام کے مطابق، یہ واقعہ 15ویں اسٹریٹ اور انڈیپنڈنس ایونیو کے قریب، جو نیشنل مال کے قریب واقع ہے، پیش آیا، یعنی وائٹ ہاؤس سے چند بلاکس کے فاصلے پر۔ سیکیورٹی اداروں کا کہنا ہے کہ فائرنگ میں ایک شخص کو قانون نافذ کرنے والے اہلکار نے گولی ماری، تاہم اس کی حالت فوری طور پر واضح نہیں ہو سکی۔ خوش قسمتی سے وائٹ ہاؤس کے اندر کوئی جانی نقصان نہیں ہوا۔
واقعے کے بعد کچھ دیر کے لیے ماحول انتہائی کشیدہ رہا، مگر بعد میں لاک ڈاؤن ختم کر دیا گیا۔ اس واقعے کے بعد، امریکی صدر ڈونلڈ ٹرمپ نے وائٹ ہاؤس کے ایسٹ روم میں شیڈول تقریب میں شرکت کی، جو تقریباً 45 منٹ تاخیر سے شروع ہوئی۔ میٹروپولیٹن پولیس ڈپارٹمنٹ نے شہریوں کو ہدایت کی ہے کہ وہ واقعے کے مقام سے دور رہیں کیونکہ کئی سڑکیں گھنٹوں تک بند رہنے کا امکان ہے۔
