ٹینس کے عالمی شہرت یافتہ کھلاڑی اور 24 گرینڈ سلام ٹائٹلز کے حامل نوواک جوکووچ نے پروفیشنل ٹینس پلیئرز ایسوسی ایشن (PTPA) سے مکمل طور پر علیحدگی اختیار کر لی ہے، جس کی تصدیق انہوں نے سوشل میڈیا پر جاری اپنے بیان میں کی۔
نوواک جوکووچ نے اپنے پیغام میں کہا کہ انہوں نے طویل غور و فکر اور محتاط سوچ بچار کے بعد یہ فیصلہ کیا ہے کہ وہ اب پروفیشنل ٹینس پلیئرز ایسوسی ایشن کا حصہ نہیں رہیں گے۔ ان کا کہنا تھا کہ وہ اس تنظیم کے قیام کے بنیادی مقصد پر آج بھی فخر محسوس کرتے ہیں، کیونکہ اس کا مقصد ٹینس کھلاڑیوں کو ایک آزاد، مضبوط اور مؤثر آواز فراہم کرنا تھا۔جوکووچ کے مطابق اگرچہ PTPA کا آغاز کھلاڑیوں کے حقوق کے تحفظ اور ان کے مفادات کے لیے کیا گیا تھا، تاہم وقت کے ساتھ تنظیم کی موجودہ سمت، طریقۂ کار اور بعض فیصلے ان کی ذاتی اقدار، سوچ اور وژن سے ہم آہنگ نہیں رہے۔ اسی اختلاف کی بنیاد پر انہوں نے تنظیم سے الگ ہونے کا فیصلہ کیا۔انہوں نے مزید کہا کہ اب وہ اپنی تمام تر توجہ ٹینس، اپنے خاندان اور کھیل کے مثبت فروغ پر مرکوز رکھیں گے اور وہ مستقبل میں بھی ٹینس کے نظام میں بہتری کے لیے انفرادی سطح پر کردار ادا کرتے رہیں گے۔واضح رہے کہ پروفیشنل ٹینس پلیئرز ایسوسی ایشن کی بنیاد 2021 میں نوواک جوکووچ اور کینیڈین ٹینس کھلاڑی واسیق پوسپسل نے رکھی تھی۔ اس تنظیم کا مقصد اے ٹی پی اور ڈبلیو ٹی اے جیسے روایتی اداروں کے مقابلے میں کھلاڑیوں کے حقوق کے لیے ایک آزاد پلیٹ فارم مہیا کرنا تھا۔
گزشتہ سال مارچ میں PTPA نے اے ٹی پی، ڈبلیو ٹی اے اور دیگر بڑے ٹینس اداروں کے خلاف قانونی کارروائی بھی کی تھی، جس میں مؤقف اختیار کیا گیا تھا کہ یہ ادارے کھلاڑیوں کے ساتھ منظم ناانصافی، غیر مساوی آمدنی کی تقسیم اور غیر مسابقتی پالیسیوں پر عمل کر رہے ہیں۔تاہم ذرائع کے مطابق نوواک جوکووچ اس قانونی مقدمے کے بعض پہلوؤں اور حکمتِ عملی سے متفق نہیں تھے۔ دوسری جانب اے ٹی پی اور ڈبلیو ٹی اے نے PTPA کے تمام الزامات کو سختی سے مسترد کرتے ہوئے انہیں بے بنیاد قرار دیا تھا۔نوواک جوکووچ کی تنظیم سے علیحدگی کو عالمی ٹینس حلقوں میں ایک اہم پیش رفت قرار دیا جا رہا ہے، جس کے اثرات مستقبل میں کھلاڑیوں کی نمائندگی اور ٹینس گورننس پر پڑ سکتے ہیں۔
