لاہور کے مختلف علاقوں میں بارش کا سلسلہ جاری ہے، جس کے باعث موسم خوشگوار ہو گیا، تاہم متعدد نشیبی علاقوں میں پانی جمع ہونے سے شہریوں کو مشکلات کا سامنا کرنا پڑ رہا ہے۔
ہربنس پورہ اور اس کے گردونواح میں موسلادھار بارش ریکارڈ کی گئی، جس کے بعد سڑکیں اور گلیاں پانی سے بھر گئیں اور کئی علاقے جل تھل کا منظر پیش کرنے لگے۔
شہریوں کا کہنا ہے کہ نکاسی آب کے مؤثر انتظامات نہ ہونے کے باعث بعض علاقوں میں آمدورفت شدید متاثر ہوئی، جبکہ گاڑیوں اور موٹرسائیکل سواروں کو بھی دشواری کا سامنا کرنا پڑا۔
دوسری جانب متعلقہ اداروں نے بارش کے بعد جمع ہونے والے پانی کی نکاسی کے لیے کارروائیاں شروع کر دی ہیں۔ انتظامیہ کا کہنا ہے کہ نشیبی علاقوں سے پانی کی جلد از جلد نکاسی کو یقینی بنایا جا رہا ہے تاکہ ٹریفک اور معمولاتِ زندگی بحال کیے جا سکیں۔
انتظامیہ نے شہریوں سے بھی اپیل کی ہے کہ بارش کے دوران غیر ضروری سفر سے گریز کریں اور پانی جمع ہونے والے مقامات پر احتیاط برتیں۔
