اقوام متحدہ کی جنرل اسمبلی نے حالیہ انتخابات میں آسٹریا، کرغزستان، پرتگال، ٹرینیڈاڈ و ٹوباگو اور زمبابوے کو اقوام متحدہ کی سلامتی کونسل کی غیر مستقل نشستوں کے لیے منتخب کر لیا ہے۔ ان ممالک کی دو سالہ مدت یکم جنوری 2027 سے شروع ہوگی۔
یورپی نشستوں میں پرتگال نے 134 ووٹ اور آسٹریا نے 131 ووٹ حاصل کیے، جبکہ جرمنی 104 ووٹ لے کر تیسرے نمبر پر رہا اور نشست حاصل نہ کر سکا۔ جرمنی نے اس نشست کے لیے بھرپور سفارتی کوششیں کی تھیں۔ایشیا پیسیفک گروپ کی نشست کے لیے فلپائن اور کرغزستان کے درمیان سخت مقابلہ ہوا جو چار راؤنڈ تک چلا۔ آخرکار کرغزستان نے 142 کے مقابلے میں 49 ووٹ حاصل کر کے واضح برتری سے نشست جیت لی۔افریقہ اور کیریبین خطے کی نشستوں کے لیے زمبابوے اور ٹرینیڈاڈ و ٹوباگو بلا مقابلہ منتخب ہوئے۔
سلامتی کونسل کا کردار اقوام متحدہ کے نظام میں انتہائی اہم ہے، کیونکہ یہ واحد ادارہ ہے جو عالمی امن و سلامتی کے معاملات پر پابند فیصلے کر سکتا ہے، بشمول پابندیاں لگانا اور طاقت کے استعمال کی اجازت دینا۔ اس کے پانچ مستقل رکن ممالک — امریکا، چین، روس، برطانیہ اور فرانس — ویٹو پاور کے ساتھ موجود ہیں، جبکہ باقی 10 غیر مستقل ارکان علاقائی بنیادوں پر دو سال کے لیے منتخب کیے جاتے ہیں۔
