امریکا کی ریاست واشنگٹن کے شہر اوبورن (Auburn) میں حال ہی میں ایک منفرد اور دلچسپ بین الاقوامی مقابلے "ٹی ریکس ریس" (T-Rex Race) کا انعقاد ہوا، جس میں 300 سے زائد افراد نے حصہ لیا۔
اس ایونٹ میں شرکاء نے 'انفلیٹ ایبل ڈائناسار' کے ملبوسات پہن کر دوڑ لگائی، جس سے شائقین خوب محظوظ ہوئے۔اس سالانہ ریس میں مرد، خواتین اور بچوں کے لیے علیحدہ علیحدہ دوڑیں منعقد کی گئیں، تاکہ ہر عمر کے افراد اپنی دلچسپی اور صلاحیتوں کا اظہار کرسکیں۔ کئی مناظر نہایت دلچسپ اور ناقابلِ یقین تھے، جن میں خاص طور پر پیراشوٹنگ ٹی ریکس (Parachuting T-Rex) نے شائقین کی توجہ حاصل کی۔ اس مقابلے میں شریک چند افراد نے جہاز سے پیراشوٹ کے ذریعے ہوا میں چھلانگ لگائی، اسٹیڈیم میں لینڈ کیا، اور پھر ٹی ریکس کاسٹیوم پہن کر ریس مکمل کی۔یہ دلچسپ تقریب دراصل 2017 میں ایک مقامی پیسٹ کنٹرول کمپنی کی ٹیم بلڈنگ سرگرمی کے طور پر شروع ہوئی تھی، تاہم اب یہ ہر سال منعقد ہونے والا ایک عالمی فیسٹیول بن چکا ہے، جو نہ صرف امریکا بلکہ دنیا بھر کے لوگوں کو متوجہ کر رہا ہے۔
2022 کے بعد سے جاپان میں بھی ایسی ہی ٹی ریکس ریسز منعقد کی جا رہی ہیں، جہاں انہیں بے حد پذیرائی ملی ہے۔ اس ایونٹ کو صرف مزاح اور تفریح کا ذریعہ ہی نہیں بلکہ معاشرتی میل جول، کمیونٹی سرگرمیوں کے فروغ، اور صحت مند طرزِ زندگی کے فروغ کا ایک منفرد امتزاج سمجھا جاتا ہے۔ٹی ریکس ریس نہ صرف بچوں بلکہ بڑوں کے لیے بھی ایک ایسا موقع ہے جس میں وہ روزمرہ کی سنجیدگی سے ہٹ کر ہنسی، خوشی اور اجتماعیت کا تجربہ کرتے ہیں، اور یہی وجہ ہے کہ اس ایونٹ کی مقبولیت ہر سال بڑھتی جا رہی ہے۔
