متحدہ قومی موومنٹ (ایم کیو ایم) پاکستان کے رہنما فاروق ستار نے کراچی کے تعلیمی نظام پر تنقید کرتے ہوئے کہا ہے کہ شہر کے طلباء کے مستقبل کو تاریک کرنے کی سازش کی جا رہی ہے۔
کراچی میں میڈیا سے گفتگو کرتے ہوئے فاروق ستار نے کہا کہ پری میڈیکل فرسٹ ایئر کے 33 فیصد طلباء و طالبات پاس ہوئے ہیں، جبکہ پری انجینئرنگ میں 71 فیصد اور پری میڈیکل میں 67 فیصد طلباء فیل ہو گئے ہیں۔ انہوں نے کہا کہ والدین اسکروٹنی کے لیے فیس جمع کرائیں گے، جو ایک اضافی مالی بوجھ ہے اور اس سے معیاری تعلیم کے حصول میں مشکلات بڑھ رہی ہیں۔فاروق ستار نے مزید کہا کہ قابل طلباء کا مستقبل تباہ کیا جا رہا ہے اور یہ اقدامات صرف آمدنی کے ذرائع بڑھانے کے لیے کیے جا رہے ہیں۔ ان کا کہنا تھا کہ کراچی کے امتحانی بورڈ کو تباہ کیا جا رہا ہے اور شہر کے نوجوانوں پر اعلیٰ تعلیم کے دروازے بند کیے جا رہے ہیں۔
ایم کیو ایم کے رہنما نے یہ بھی کہا کہ کراچی کے میٹرک اور انٹر بورڈ کے نتائج میں کمی کی جا رہی ہے، جب کہ اندرونِ سندھ میں نتائج کو کامیاب قرار دیا جا رہا ہے، جو کہ ایک غیر منصفانہ عمل ہے۔ ان کا کہنا تھا کہ یہ صورتحال کراچی کے تعلیمی معیار کو متاثر کر رہی ہے اور شہر کے نوجوانوں کے لیے ترقی کے مواقع محدود ہو رہے ہیں۔
