بالی ووڈ اداکارہ سونم کپور نے اپنے دوسرے بیٹے کی پہلی جھلک مداحوں کے ساتھ شیئر کر دی ہے۔
سونم نے اپنے شوہر آنند آہوجا کے ساتھ 29 مارچ کو بچے کو جنم دیا تھا، اور ایک ہفتے بعد انہوں نے ممبئی کے ایچ این ریلائنس اسپتال سے اپنی تصاویر انسٹاگرام پر شیئر کیں۔شیئر کی گئی تصاویر میں سونم اسپتال کے بستر پر لیٹی ہیں، آنکھیں بند اور چہرے پر ہلکی سی مسکراہٹ، جبکہ نومولود بیٹے کو سینے سے لگائے ہوئے ہیں۔ بچہ سفید کپڑوں میں لپٹا ہوا ہے، اور تصویر میں زیادہ واضح نہیں، مگر فوکس بچے اور ماں کی محبت پر ہے۔سونم نے پوسٹ کے ساتھ دل کی گہرائی سے لکھا کہ وہ اپنی میڈیکل ٹیم کی بہت مشکور ہیں، جنہوں نے بچے کی محفوظ پیدائش میں مدد کی۔ انہوں نے خاص طور پر اپنی ڈاکٹر کا ذکر کیا، جنہوں نے دونوں حملوں کے دوران رہنمائی اور حمایت فراہم کی۔اداکارہ نے بتایا کہ اسپتال کی پوری ٹیم نہ صرف پیشہ ورانہ طور پر بلکہ خلوص اور ہمدردی میں بھی مثالی تھی، جس نے انہیں اعتماد، سکون اور اطمینان کا احساس دیا۔
سونم اور آنند نے پہلے 29 مارچ کو ایک مشترکہ بیان کے ذریعے بچے کی آمد کا اعلان کیا تھا۔ بیان میں کہا گیا:"ہم اپنے بیٹے کی آمد کا اعلان کرتے ہوئے بے حد خوش ہیں، ہمارا خاندان بڑھ گیا ہے، اور اس کی آمد نے ہمارے دل کو اور بھی وسیع کر دیا ہے۔"بیان میں یہ بھی بتایا گیا کہ ان کا پہلا بیٹا وائیو، جو اب 4 سال کا ہے، چھوٹے بھائی کا استقبال کرنے کے لیے بہت پرجوش ہے، اور دونوں والدین اپنے نئے اضافے پر بے حد خوش ہیں۔
