عرب میڈیا کے مطابق اسرائیلی فوج نے غزہ کے لیے امداد لے جانے والے گلوبل صمود فلوٹیلا کی آخری کشتی کو بھی قبضے میں لے لیا۔
پولینڈ کے جھنڈے والی اس کشتی پر 6 افراد سوار تھے۔اسرائیلی فوج نے فلوٹیلا کی تمام کشتیوں کو قبضے میں لے کر تقریباً 500 کارکنان کو گرفتار کیا، جن میں معروف ماحولیاتی کارکن گریٹا تھنبرگ، بارسلونا کی سابق میئر ادا کولو اور یورپی پارلیمنٹ کی رکن ریما حسن بھی شامل ہیں۔ اسرائیلی جیل انتظامیہ کے مطابق 200 سے زائد کارکنان کو صحرائے نقب کی جیل منتقل کر دیا گیا ہے، جہاں ان کے خلاف آبادی و امیگریشن اتھارٹی کے تحت کارروائی ہوگی۔
کشتیوں پر قبضے اور کارکنان کی گرفتاری کے خلاف دنیا بھر میں احتجاج جاری ہے۔ کولمبیا نے اسرائیلی سفارتکاروں کو ملک بدر کرنے اور فری ٹریڈ معاہدہ ختم کرنے کا اعلان کیا، جبکہ جرمنی، فرانس، برطانیہ، اسپین، یونان اور آئرلینڈ نے عملے کے حقوق کے احترام پر زور دیا۔ اقوامِ متحدہ کی نمائندہ فرانچسسکا البانیز نے اسرائیل کے اقدام کو غیر قانونی قرار دیا۔
