وفاقی وزیر اطلاعات عطا اللہ تارڑ نے لاہور میں اے پی پی ایمپلائز یونین پنجاب کی تقریب حلف برداری سے خطاب کرتے ہوئے کہا کہ پیکا ایکٹ کا مقصد فیک نیوز کا خاتمہ اور سوشل میڈیا کے خطرات کا تدارک کرنا ہے۔
انہوں نے اس ایکٹ میں دنیا کے بہترین طریقوں کو اپنانے کی بات کی اور کہا کہ سوشل میڈیا کے خطرات کو روکنے کے لیے یہ ایک اچھا اقدام ہے۔عطا اللہ تارڑ نے مزید کہا کہ صحافت کی آڑ میں سوشل میڈیا کو بے لگام نہیں چھوڑا جا سکتا۔ اگر اس ایکٹ میں کوئی متنازع شق ہے تو اسے سامنے لایا جائے اور اس پر بات کرنے کے لیے حکومت تیار ہے۔ انہوں نے کہا کہ جلد ہی ڈیجیٹل میڈیا پروٹیکشن اتھارٹی میں نجی شعبے سے نامزدگیاں کی جائیں گی، اور پریس کلب یا صحافتی تنظیموں سے منسلک صحافیوں کو اس میں شامل کیا جائے گا۔
وزیراطلاعات نے اداروں کے ملازمین کی اہمیت پر زور دیتے ہوئے کہا کہ اداروں کی کامیابی کی بنیاد ان کی محنت، لگن اور مہارتوں پر ہے۔ کرپشن نے اداروں کو ناقابل تلافی نقصان پہنچایا، اور حکومت اداروں کی بہتری اور منافع بخش بنانے کے لیے تمام وسائل بروئے کار لا رہی ہے۔انہوں نے کہا کہ پی ٹی وی، ریڈیو پاکستان اور اے پی پی جیسے قومی ادارے عوام کو معلومات فراہم کرنے کے ساتھ ساتھ ملکی نظریاتی سرحدوں کے محافظ بھی ہیں۔ موجودہ دور میں جدید ٹیکنالوجی کا استعمال ضروری ہے، اور ہمیں دنیا کا مقابلہ کرنے کے لیے اسے اپنانا ہوگا۔
