روس کے ایک معروف ایتھلیٹ نے دعویٰ کیا ہے کہ انہوں نے فضاء میں سب سے زیادہ اونچائی پر فٹبال میچ کھیل کر ایک نیا عالمی ریکارڈ قائم کیا ہے۔
ان کے مطابق، یہ تاریخی میچ 1800 میٹر یعنی تقریباً 5900 فٹ کی بلندی پر ایک ہاٹ ایئر بیلون میں منعقد کیا گیا، جہاں وہ اور ان کی ٹیم ایک چھوٹے سے گراؤنڈ میں فضاء میں معلق رہتے ہوئے فٹبال کھیلتے رہے۔سوشل میڈیا پر سامنے آنے والی ویڈیوز میں دکھایا گیا ہے کہ کھلاڑی بہت احتیاط سے بیلون کی ٹوکری میں گیند پاس کر رہے ہیں، جبکہ نیچے زمین کا خوبصورت نظارہ پس منظر میں واضح طور پر نظر آ رہا ہے۔ ایک طیارہ بھی مسلسل بیلون کے گرد چکر لگاتا ہوا دکھائی دے رہا ہے، جو اس منفرد تجربے کی تصدیق کرتا ہے۔روسی ایتھلیٹ کا کہنا ہے کہ یہ دنیا میں پہلی بار ہوا ہے کہ فٹبال کا باقاعدہ کھیل اتنی بلند سطح پر کسی ہاٹ ایئر بیلون میں کھیلا گیا ہو۔
ان کا یہ کارنامہ، جسمانی مہارت کے ساتھ ساتھ زبردست اعصابی مضبوطی کا بھی مظاہرہ ہے، کیونکہ تیز ہوا اور محدود جگہ میں کھیل کو جاری رکھنا انتہائی مشکل ہوتا ہے۔اس دعوے نے انٹرنیٹ صارفین کو حیران کر دیا ہے۔ بہت سے لوگ اسے بہادری اور جدت کی مثال قرار دے رہے ہیں، جبکہ کچھ اسے غیر ضروری خطرہ مول لینے کے مترادف بھی کہہ رہے ہیں۔یہ تجربہ، کسی بھی صورت میں، بہت منفرد اور دنیا بھر کی توجہ کا مرکز بن چکا ہے، اور اسے کھیل کی تاریخ میں ایک نئے باب کے طور پر دیکھا جا رہا ہے۔
