ملکی استحکام کے لئے صوفیا کی تعلیمات کا ابلاغ ضروری ہے، اسحاق ڈار

حضرت داتا گنج بخش خطے میں محبت، رواداری اور انسان دوستی کی علامت ہیں، نائب وزیر اعظم کا داتاگنج بخش کے سالانہ عرس کی تقریبات کے افتتاح پر خطاب
لاہور(آئی این پی )نائب وزیر اعظم محمد اسحاق ڈار نے کہا ہے کہ ملکی استحکام کیلئے صوفیا کی تعلیمات کا ابلاغ ضروری ہے،حضرت داتا گنج بخش خطے میں محبت، رواداری اور انسان دوستی کی علامت ہیں۔تفصیل کے مطابق حضرت سید علی بن عثمان الہجویری المعروف حضرت داتاگنج بخش کے983 ویں سالانہ عرس کی تین روزہ تقریبات کا آغاز ہوا، نائب وزیر اعظم پاکستان، سینیٹرمحمد اسحاق ڈار نے رسم چادر پوشی کی۔مشیر وزیر اعلی پنجاب/چیئرمین امور مذہبیہ کمیٹی داتا دربار علی ڈار،صوبائی وزیر ہائوسنگ بلال یاسین کے علاوہ صوبائی وزیر خزانہ میاں مجتبی شجاع الرحمن، چیئرمین اسلامی نظریاتی کونسل ڈاکٹر راغب حسین نعیمی،سیکرٹری اوقاف پنجاب ڈاکٹر احسان بھٹہ سمیت دیگر نے شرکت کی۔حضرت داتا گنج بخش کے عرس کی سالانہ تقریبات اور سبیل دودھ کا افتتاح کردیا گیا،تقریب کا آغازقاری سید صداقت علی اور قاری غلام فرید الحسنی نے تلاوت کلام پاک سے کیا۔ اسحاق ڈارکا کہنا تھا کہ ملکی استحکام کے لیے صوفیا کی تعلیمات کا ابلاغ ضروری ہے۔حضرت داتا گنج بخش خطے میں محبت، رواداری اور انسان دوستی کی علامت ہیں۔اس موقع پرنائب وزیر اعظم نے محکمہ اوقاف کی اشاعت خاص کا بھی کا افتتاح کیا۔سیکرٹری اوقاف کا کہنا تھا کہ عرس کے ایام میں پنجاب ٹورازم فورس کے 30 اہلکاران( 20 مرد اور 10 خواتین) پر مشتمل خصوصی ٹیم بھی دوشفٹوں میں اپنے فرائض سرانجام دے گی۔