دبئی میں سونے کی قیمتوں میں ایک بار پھر اضافہ دیکھنے میں آیا ہے، جس کے بعد مارکیٹ میں قیمتی دھات کے نرخ دوبارہ اوپر کی جانب بڑھ گئے ہیں۔
اس سے ایک روز قبل قیمتوں میں نمایاں کمی ریکارڈ کی گئی تھی، تاہم تازہ رجحان نے مارکیٹ کا رخ بدل دیا ہے۔تازہ اعداد و شمار کے مطابق 24 قیراط سونا 544.25 درہم فی گرام پر ٹریڈ کر رہا ہے، جو پیر کے اختتام پر 539.75 درہم تھا۔ اسی طرح 22 قیراط سونا بھی بڑھ کر 504 درہم فی گرام تک پہنچ گیا ہے، جبکہ گزشتہ روز اس میں نمایاں کمی دیکھی گئی تھی۔دیگر اقسام میں 21 قیراط سونا 483.25 درہم، 18 قیراط 414.25 درہم اور 14 قیراط 323 درہم فی گرام کی سطح پر ٹریڈ ہو رہا ہے، جس سے مجموعی طور پر مارکیٹ میں اضافے کا رجحان ظاہر ہوتا ہے۔عالمی مارکیٹ میں بھی سونے کی قیمتوں میں اتار چڑھاؤ دیکھا جا رہا ہے، جہاں اسپاٹ گولڈ 4,517 ڈالر فی اونس سے اوپر ٹریڈ کر رہا ہے، جبکہ چاندی کی قیمت میں بھی تقریباً ایک فیصد اضافہ ہوا ہے اور یہ 75.8 ڈالر فی اونس تک پہنچ گئی ہے۔
ماہرین کے مطابق موجودہ صورتحال میں سرمایہ کار مشرقِ وسطیٰ میں جاری کشیدگی، خصوصاً اسرائیل اور حزب اللّٰہ کے درمیان تناؤ اور ایران سے متعلق مذاکرات پر گہری نظر رکھے ہوئے ہیں، جس کا براہِ راست اثر سونے کی عالمی قیمتوں پر پڑ رہا ہے۔اس کے علاوہ امریکی معیشت سے متعلق اہم ڈیٹا، خاص طور پر نان فارم پے رولز اور روزگار کی رپورٹس کا بھی انتظار کیا جا رہا ہے، جو مستقبل میں شرحِ سود کے فیصلوں اور عالمی مالیاتی مارکیٹ کی سمت پر اثر انداز ہو سکتی ہیں۔
