اسلام آباد: پاکستان تحریک انصاف کے بانی اور سابق وزیراعظم عمران خان اور ان کی اہلیہ بشریٰ بی بی کی سزا کے خلاف اپیلوں پر 5 جون کو اسلام آباد ہائی کورٹ میں ہونے والی اہم سماعت سے قبل نیب نے بڑا قدم اٹھا لیا ہے۔
نیب کی خصوصی پراسیکیوشن ٹیم قائم
190 ملین پاؤنڈز کرپشن کیس میں عمران خان اور بشریٰ بی بی کی سزا کے خلاف اپیلوں اور سزا معطلی کی درخواستوں پر موثر انداز میں عدالت کی معاونت کے لیے نیب نے خصوصی پراسیکیوشن ٹیم تشکیل دے دی ہے۔یہ اقدام چیئرمین نیب کی منظوری اور پراسیکیوٹر جنرل نیب سید احتشام قادر شاہ کی ہدایت پر عمل میں آیا۔ ٹیم میں پانچ سینئر پراسیکیوٹرز شامل ہیں، جن کی قیادت سردار مظفر احمد خان کریں گے۔
ٹیم کے دیگر ارکان
عرفان احمد
سہیل عارف
رافع مقصود
یاسر سلیم رانا
نیب کے مطابق یہ ٹیم 5 جون کو اسلام آباد ہائی کورٹ میں ہونے والی سماعت کے دوران عدالت کے سامنے نیب کا مؤقف پیش کرے گی اور تمام قانونی نکات پر روشنی ڈالے گی۔
پس منظر
یاد رہے کہ عمران خان اور ان کی اہلیہ بشریٰ بی بی کو 190 ملین پاؤنڈز کے غیر قانونی استعمال اور بدعنوانی کے الزامات کے تحت سزا سنائی گئی تھی۔ انہوں نے اپنی سزاؤں کے خلاف اپیلیں دائر کر رکھی ہیں، جن کے ساتھ سزا معطلی کی درخواستیں بھی جمع ہیں۔
5 جون کو اہم سماعت
ان اپیلوں اور درخواستوں پر اسلام آباد ہائی کورٹ میں 5 جون کو سماعت متوقع ہے، جس میں نیب کی جانب سے تشکیل دی گئی یہ خصوصی ٹیم عدالت کے سامنے مکمل دلائل دے گی۔
