نیویارک: پاکستان کے سابق وزیر خارجہ اور پاکستان پیپلز پارٹی کے چیئرمین بلاول بھٹو زرداری کی قیادت میں ایک اعلیٰ سطحی سفارتی وفد نے امریکا کا اہم دورہ شروع کر دیا ہے۔
وفد آج نیویارک میں اقوام متحدہ (UN) میں اپنی سفارتی سرگرمیوں اور ملاقاتوں کا باقاعدہ آغاز کرے گا۔
ملاقاتوں کا شیڈول:
دفتر خارجہ کے مطابق پاکستانی وفد اقوام متحدہ کے سیکریٹری جنرل اور سلامتی کونسل کے مستقل و غیر مستقل اراکین سے ملاقات کرے گا، جس میں انہیں جنوبی ایشیا خصوصاً بھارت کے ساتھ جاری کشیدگی، مسئلہ کشمیر اور خطے میں امن و استحکام کے حوالے سے پاکستان کے موقف سے آگاہ کیا جائے گا۔
اہم نکات:
وفد غیر وابستہ ممالک (NAM) کی تنظیم کے رکن ممالک سے بھی اہم ملاقاتیں کرے گا۔نیویارک میں اسلامی تعاون تنظیم (OIC) کے گروپ کو بھی ایک بریفنگ دی جائے گی جس میں مسئلہ کشمیر، اسلامو فوبیا، فلسطین اور مسلم دنیا کو درپیش دیگر چیلنجز پر پاکستان کا مؤقف واضح کیا جائے گا۔کل (3 جون) سے وفد واشنگٹن روانہ ہوگا جہاں امریکی حکام، پالیسی ساز اداروں، اور تھنک ٹینکس سے ملاقاتیں کی جائیں گی۔
بین الاقوامی دورہ:
دفتر خارجہ کے حکام کے مطابق یہ دورہ 6 جون تک جاری رہے گا۔ امریکہ کے بعد پاکستانی وفد یورپ روانہ ہوگا جہاں لندن، پیرس اور برسلز میں اہم ملاقاتیں متوقع ہیں۔ ان دوروں کے دوران پاکستان جنوبی ایشیا میں امن قائم رکھنے، دہشت گردی کے خلاف جنگ، اور علاقائی روابط کے فروغ کے لیے اپنی کوششوں کو بین الاقوامی سطح پر اجاگر کرے گا۔
مقصد:
اس سفارتی دورے کا مقصد دنیا کو یہ باور کرانا ہے کہ پاکستان ایک پرامن ملک ہے جو اپنے ہمسایوں کے ساتھ بامعنی مذاکرات اور خطے میں دیرپا امن کا خواہاں ہے۔ وفد عالمی برادری پر زور دے گا کہ وہ کشمیر جیسے دیرینہ مسائل کے حل کے لیے اپنا کردار ادا کرے اور جنوبی ایشیا کو ایک پُرامن خطہ بنانے میں پاکستان کی حمایت کرے۔
