چیئرمین پاکستان پیپلزپارٹی اور سابق وزیر خارجہ بلاول بھٹو زرداری نے کہا ہے کہ پاکستان دہشت گردی کے خلاف جنگ میں ہر اول دستے کا کردار ادا کر رہا ہے، اور سرنڈر کرنا پاکستان کی لغت میں شامل نہیں۔
انہوں نے کہا کہ ضرب عضب اور ردالفساد جیسے آپریشنز نے دہشت گردوں کی کمر توڑ دی۔
عالمی کانفرنس سے خطاب
بلاول بھٹو نے ’’دنیا کیلئے پاکستان کی دہشت گردی کے خلاف جنگ‘‘ کے موضوع پر عالمی کانفرنس سے خطاب کرتے ہوئے کہا:"دہشتگردی ایک عالمی مسئلہ ہے، پاکستان نے اس کے خلاف سب سے زیادہ جانی و مالی قربانیاں دی ہیں۔ دو دہائیوں کی جنگ میں 92 ہزار شہادتیں ہوئیں۔"انہوں نے کہا کہ پاکستان نے اپنی اگلی نسلوں کے محفوظ مستقبل کے لیے یہ جنگ لڑی اور لڑ رہا ہے۔
بھارت کو مخاطب پیغام
بلاول بھٹو نے بھارت کو مخاطب کرتے ہوئے کہا:
الزام تراشی کی بجائے مذاکرات کی میز پر آئیں
کشمیر جیسے تصفیہ طلب مسائل پر بات چیت ضروری ہے
بھارت پانی کو ہتھیار کے طور پر استعمال کرنے کی روش ترک کرے
بھارت کو چاہئے کہ پاکستان کی انسدادِ دہشت گردی کی صلاحیتوں سے سیکھے
افغانستان سے متعلق خدشات
چیئرمین پیپلزپارٹی نے کہا کہ:
افغانستان سے کہا ہے کہ وہ اپنی سرزمین پاکستان کے خلاف دہشت گردی کے لیے استعمال نہ ہونے دے
طالبان حکومت کے بعد افغان سرزمین سے حملوں میں 40 فیصد اضافہ ہوا ہے
افغان عبوری حکومت دوحہ معاہدے کی پاسداری کرے
ڈیجیٹل چیلنجز اور نوجوانوں کی اہمیت
بلاول نے کہا کہ:"ڈیجیٹل پروپیگنڈا عصر حاضر کا ایک نیا چیلنج ہے۔ ہمیں نوجوانوں کو فائر وال کے بجائے تیز رفتار انٹرنیٹ دینا ہوگا۔ پاکستان کی 65 فیصد آبادی 30 سال سے کم عمر ہے، انہیں روزگار اور ترقی کے مساوی مواقع ملنے چاہئیں۔"
عالمی برادری سے اپیل
بلاول بھٹو زرداری نے عالمی برادری پر زور دیا کہ وہ:
دہشت گردی کے خلاف جنگ میں پاکستان سے تعاون کرے
پاکستان کی قربانیوں کو عالمی سطح پر تسلیم کرے
