صدر مملکت آصف علی زرداری نے مقبوضہ کشمیر کی آزادی کو وقت کی اہم ضرورت قرار دیتے ہوئے کہا ہے کہ بھارت میں مسلمانوں سمیت اقلیتوں پر مظالم کا بازار گرم ہے۔
انہوں نے اس بات پر زور دیا کہ کشمیری عوام کو حق خود ارادیت دینا انسانی حقوق کی بحالی کے لیے ضروری ہے۔انہوں نے گلگت بلتستان کے عوام کی ملکی ترقی میں شانہ بشانہ ہونے کی تعریف کی اور کہا کہ یہ علاقہ معدنیات سے مالا مال ہے، جس سے ملکی معیشت کو فائدہ پہنچ سکتا ہے۔گلگت بلتستان کے 78ویں یوم آزادی کے موقع پر ایک تقریب کا انعقاد کیا گیا، جس میں صدر مملکت آصف علی زرداری نے شرکت کی اور پریڈ کا معائنہ کیا۔ تقریب کے دوران صدر کو گورنر گلگت بلتستان نے روایتی ٹوپی پہنائی، اور وہ مہمان خصوصی کے طور پر شریک ہوئے۔
تقریب سے خطاب کرتے ہوئے صدر نے یاد دلایا کہ یکم نومبر 1947 کو گلگت بلتستان کے عوام نے عظیم قربانیاں دے کر آزادی حاصل کی۔ انہوں نے جنگ آزادی میں شہید ہونے والوں کو خراج تحسین پیش کیا اور کہا کہ گلگت بلتستان کے عوام کی قربانیاں تاریخ میں سنہری حروف سے لکھی جائیں گی۔ صدر نے اس موقع پر کہا کہ علاقے کے عوام کے حوصلے اور قربانیاں قابلِ فخر ہیں، اور یہ علاقہ ملکی ترقی میں اہم کردار ادا کر سکتا ہے۔
