سپرہائی وے کے علاقے خادم سولنگی گوٹھ میں 23 جنوری 2025 کو ایک خالی پلاٹ سے ملنے والی خاتون کی تشدد زدہ لاش کی تاحال شناخت نہیں ہو سکی۔
پولیس کے مطابق مقتولہ کی عمر تقریباً 30 برس کے قریب تھی اور اسے تشدد کا نشانہ بنا کر قتل کیا گیا تھا۔ مقتولہ کے جسم پر گولی کا کوئی زخم نہیں ملا، تاہم اس کی حالت سے ظاہر ہوتا ہے کہ وہ خانہ بدوش ہو سکتی ہے۔اس کیس کا مقدمہ سائٹ سپرہائی تھانے میں الزام نمبر 132/2025 کے تحت نامعلوم ملزمان کے خلاف درج کیا گیا تھا۔ ایس ایچ او سائٹ سپرہائی انسپکٹر خالد عباسی نے بتایا کہ تفتیش کے دوران مقتولہ کا بائیو میٹرک بھی کرایا گیا تھا، مگر اس سے کوئی شناختی معلومات حاصل نہیں ہو سکیں۔ پوسٹ مارٹم کے دوران مقتولہ کے اعضا کا کیمیکل ایگزامن کیا گیا، تاہم اس کی رپورٹ ابھی تک موصول نہیں ہوئی۔سائٹ سپرہائی شعبہ تفتیش کے سب انسپکٹر عبدالشکور نے کہا کہ جب مقتولہ کے ورثا کا پتا چل جائے گا، تو تفتیش کا آغاز کیا جائے گا۔ پولیس کی جانب سے اس قتل کی تحقیقات جاری ہیں اور تمام وسائل استعمال کیے جا رہے ہیں تاکہ ملزمان کا پتا چلایا جا سکے۔
