چیئرمین پاکستان تحریک انصاف (پی ٹی آئی) بیرسٹر گوہر نے حکومت اور اپوزیشن کی مذاکراتی کمیٹیوں کے اجلاس کے حوالے سے اپنے ردعمل کا اظہار کیا ہے۔
ان کا کہنا تھا کہ دونوں کمیٹیوں کے تمام ارکان بہترین سیاسی بصیرت کے حامل ہیں اور ان کے درمیان ہونے والے مذاکرات ملک کی سیاسی صورتحال میں اہم تبدیلی لا سکتے ہیں۔بیرسٹر گوہر نے مزید کہا کہ اپوزیشن مذاکراتی کمیٹی کے تمام ارکان 2 جنوری 2025 کو ہونے والے اجلاس میں شریک ہوں گے۔ ان کا یہ بھی کہنا تھا کہ مذاکرات میں دونوں فریقین کو کھلے دل اور نیک نیتی سے حصہ لینا چاہیے، کیونکہ سنجیدہ کوششیں ہمیشہ مثبت نتائج تک پہنچاتی ہیں۔چیئرمین پی ٹی آئی نے مذاکراتی کمیٹیوں کی اہمیت کو اجاگر کرتے ہوئے کہا کہ اگر حکومت اور اپوزیشن کے درمیان مذاکرات کامیاب ہوتے ہیں تو یہ پاکستان کی کامیابی ہوگی۔
انہوں نے توقع ظاہر کی کہ مذاکراتی کمیٹیاں جلد ہی کم وقت میں کسی نہ کسی حل تک پہنچنے میں کامیاب ہو جائیں گی، جو ملک کے سیاسی استحکام کے لیے ضروری ہے۔یہ بیان اس وقت آیا ہے جب ملک میں سیاسی درجہ حرارت بلند ہے اور حکومت اور اپوزیشن کے درمیان اختلافات موجود ہیں، جس کی وجہ سے دونوں طرف سے مذاکراتی عمل پر زور دیا جا رہا ہے۔
