ہربنس پورہ میں اوپن مارکیٹ میں سرکاری نرخ نامے پر عملدرآمد نہ ہونے کے باعث دکانداروں کی جانب سے پھل اور سبزیاں من مانی قیمتوں پر فروخت کرنے کا سلسلہ جاری ہے، جس کے نتیجے میں شہریوں کو اضافی قیمتیں ادا کرنا پڑ رہی ہیں۔
مارکیٹ ذرائع کے مطابق، سرکاری نرخوں کے برعکس، آلو، بیگن، بھنڈی، ٹماٹر، کریلے اور دیگر سبزیوں کی قیمتیں کئی گنا زیادہ فروخت کی جا رہی ہیں۔مثال کے طور پر، آلو کی سرکاری قیمت 32 روپے فی کلو مقرر ہے، لیکن مارکیٹ میں یہ 45 روپے فی کلو میں فروخت ہو رہا ہے۔ اسی طرح، بیگن کی سرکاری قیمت 90 روپے ہے، مگر یہاں 120 روپے فی کلو میں بک رہا ہے۔ بھنڈی کی سرکاری قیمت 179 روپے ہے، جبکہ اوپن مارکیٹ میں 250 روپے فی کلو میں دستیاب ہے۔ ٹماٹر کی سرکاری قیمت 190 روپے ہے، جبکہ مارکیٹ میں یہ 230 روپے فی کلو میں فروخت ہو رہا ہے۔ کریلے کی سرکاری قیمت 110 روپے مقرر ہے، لیکن یہاں 170 روپے فی کلو میں فروخت ہو رہے ہیں۔
پھلوں کی قیمتوں میں بھی زبردست فرق دیکھا جا رہا ہے۔ آم چونسہ کی سرکاری قیمت 310 روپے فی کلو ہے، مگر مارکیٹ میں یہ 370 روپے فی کلو میں بک رہا ہے۔ آڑو کی سرکاری قیمت 305 روپے ہے، جبکہ یہاں 390 روپے فی کلو میں دستیاب ہے۔ سیب کی سرکاری قیمت 310 روپے ہے، مگر مارکیٹ میں یہ 390 روپے فی کلو میں فروخت ہو رہا ہے۔ کیلا درجہ اول کی سرکاری قیمت 200 روپے فی درجن ہے، لیکن مارکیٹ میں یہ 250 روپے فی درجن تک فروخت ہو رہا ہے۔شہریوں نے سرکاری نرخوں پر عملدرآمد کو یقینی بنانے اور نرخ نامے سے تجاوز کرنے والے دکانداروں کے خلاف سخت کارروائی کا مطالبہ کیا ہے تاکہ عوام کو مناسب قیمتوں پر اشیائے خوردونوش کی فراہمی ممکن بنائی جا سکے۔ انتظامیہ سے اپیل کی گئی ہے کہ وہ اس مسئلے کا فوری نوٹس لے اور مارکیٹ میں قیمتوں کو کنٹرول کرے۔
