پاکستان پیپلز پارٹی کی رہنما اور سینیٹر شیری رحمٰن نے فلسطین سے متعلق فرانس اور برطانیہ کے مؤقف کو خوش آئند قرار دیا ہے اور عالمی برادری سے مزید مؤثر اقدامات کا مطالبہ کیا ہے۔
شیری رحمٰن نے اپنے بیان میں کہا کہ:"فرانس اور برطانیہ کا فلسطین کو تسلیم کرنے کا فیصلہ خوش آئند ہے، ظلم کی انتہا کے بعد بالآخر دنیا کو غزہ کا درد محسوس ہونے لگا ہے۔ بھوک سے بلکتے فلسطینی بچوں کی آہوں نے عالمی ضمیر کو جھنجھوڑ دیا ہے۔"
انصاف اور انسانی ہمدردی کی سمت قدم
شیری رحمٰن کا کہنا تھا کہ برطانیہ اور فرانس کا یہ فیصلہ انصاف، انسانی ہمدردی اور عالمی امن کی سمت ایک اہم قدم ہے۔ انہوں نے مزید کہا کہ:"فرانس اور برطانیہ سمیت دیگر ممالک کے دباؤ کے بعد ہی اسرائیل نے امدادی ٹرک داخل ہونے کی اجازت دی۔"
اسرائیلی مظالم اور شہادتیں
شیری رحمٰن نے کہا کہ اسرائیل نے خوراک اور پانی کو ہتھیار بنا کر ظلم و بربریت کی انتہا کی۔ انہوں نے انکشاف کیا کہ:غزہ میں کئی ماہ سے جاری اسرائیلی بمباری میں 60 ہزار سے زائد فلسطینی شہید ہو چکے ہیں۔لاکھوں افراد بھوک اور قحط کا شکار ہیں، جب کہ اسپتالوں میں طبی سہولتیں ختم ہو چکی ہیں۔
دو ریاستی حل پر زور
شیری رحمٰن نے مزید کہا:"دو ریاستی حل ہی واحد راستہ ہے جو مشرقِ وسطیٰ میں دیرپا امن لا سکتا ہے، اس لیے اقوام متحدہ اور عالمی طاقتوں کو محض بیانات سے آگے بڑھ کر مؤثر اقدامات کرنا ہوں گے۔"
