تیز رفتار کار بجلی کے کھمبے سے جا ٹکرائی، 1زخمی

مولانا شوکت علی روڈ پر حادثہ، زخمی جناح ہسپتال منتقل، تحقیقات جاری 
لاہور (کرائم رپورٹر) مولانا شوکت علی روڈ پر تیز رفتار کار بے قابو ہو کر بجلی کے کھمبے سے جا ٹکرائی، جس کے نتیجے میں کار سوار زخمی ہو گیا۔ ریسکیو حکام کے مطابق اطلاع ملتے ہی امدادی ٹیمیں موقع پر پہنچ گئیں اور زخمی کو ابتدائی طبی امداد فراہم کرنے کے بعد مزید علاج کے لیے جناح ہسپتال منتقل کر دیا۔ حادثے کے باعث گاڑی کا اگلا حصہ مکمل طور پر تباہ ہو گیا، جبکہ ریسکیو اہلکاروں نے موقع پر ضروری امدادی کارروائیاں مکمل کیں۔ ریسکیو حکام کا کہنا ہے کہ حادثے کی وجوہات جاننے کے لیے متعلقہ اداروں نے تحقیقات شروع کر دی ہیں اور مختلف پہلوؤں کا جائزہ لیا جا رہا ہے۔