ایران ہمسایہ ممالک کیساتھ گہرے تعلقات کا خواہاں ہے:صدر مسعود پزشکیان

 یورپی ممالک اور دیگر اقوام کے ساتھ بھی حکمت، وقار اور مصلحت کی بنیاد پر تعاون جاری رکھیں گے
تہران(آئی این پی)ایرانی صدر مسعود پزشکیان نے کہا ہے کہ ایران ہمسایہ ممالک کے ساتھ ساتھ روس اور چین جیسے کلیدی بین الاقوامی شراکت داروں سے تعلقات کو مضبوط بنانے کا خواہاں ہے۔ایرانی نائب وزرائے خارجہ اور سینئر سفارتکاروں سے ملاقات کے دوران صدر پزشکیان نے کہا کہ ہم مربوط حکمت عملی اور پالیسیوں کے تحت سب سے پہلے اپنے ہمسایوں کے ساتھ قریبی، گہرے اور بہتر تعلقات کے فروغ کو ترجیح دیں گے۔انہوں نے مزید کہا کہ پھر ان ممالک سے تعلقات کو وسعت دیں گے جن سے ہمارے مثبت روابط ہیں جیسے روس، چین، برکس گروپ، شنگھائی تعاون تنظیم اور یوریشین یونین شامل ہیں، ہم یورپی ممالک اور دیگر اقوام کے ساتھ بھی حکمت، وقار اور مصلحت کی بنیاد پر تعاون جاری رکھیں گے۔