ٹک ٹاک اسٹار نتاشا ایلن، جو کئی سالوں سے اسٹیج 4 کینسر کے خلاف لڑ رہی تھیں، 28 سال کی عمر میں وفات پا گئیں۔
نتاشا نے اپنی ہمت، مثبت سوچ اور حوصلہ افزائی سے لاکھوں دلوں کو متاثر کیا۔نتاشا نے 2020ء میں اپنی بیماری کا اعلان کیا تھا جب ڈاکٹروں نے ان کے گھٹنے میں مہلک رسولی دریافت کی۔ ایک سال کے اندر ہی ان کا کینسر اسٹیج 4 سنوویئل سارکوما میں تبدیل ہو گیا، جس میں زندہ بچنے کے امکانات صرف 15 فیصد تھے۔ اس کے باوجود انہوں نے ہمت نہیں ہاری اور اپنے علاج اور زندگی کے سفر کو سوشل میڈیا پر شیئر کرنا جاری رکھا۔نتاشا کے مداحوں کے مطابق ان کی ایمانداری اور بہادری نے انہیں لاکھوں لوگوں کے لیے امید اور حوصلے کی علامت بنایا۔ ان کے سوشل میڈیا اکاؤنٹس پر ہمیشہ ان کی بیماری کے خلاف جدوجہد، علاج کی تفصیلات، شکرگزاری اور زندگی کے بارے میں مثبت پیغامات دیکھنے کو ملتے تھے۔نتاشا کی موت کی خبر ان کی ٹیم نے سوشل میڈیا کے ذریعے دی۔ ان کی ٹیم نے کہا کہ نتاشا ایک خوبصورت روح تھیں، جو محبت، مہربانی اور خوشی سے بھری ہوئی تھیں۔ وہ اپنے فالوورز کی زندگیوں میں روشنی بن کر رہیں اور کینسر آگاہی کے لیے ایک بڑی آواز ثابت ہوئیں۔
