جرمنی میں گاڑی سے ہجوم پر حملہ: بڑی تعداد میں زخمی، حملہ آور فرار

جرمنی کے دارالحکومت برلن میں ایک شخص نے گاڑی ہجوم پر چڑھا دی، جس کے نتیجے میں 6 افراد زخمی ہوگئے، جن میں سے ایک کی حالت تشویشناک بتائی جا رہی ہے۔

مقامی پولیس کے مطابق گاڑی چلانے والا شخص بغیر لائسنس ڈرائیونگ کر رہا تھا۔ پولیس نے فوری طور پر جائے وقوعہ پر پہنچ کر تحقیقات کا آغاز کر دیا۔ ابھی تک یہ واضح نہیں ہو سکا کہ یہ واقعہ دہشت گردی کا حملہ تھا یا ایک حادثہ، تاہم پولیس اس معاملے کی گہرائی سے چھان بین کر رہی ہے۔میڈیا رپورٹس کے مطابق حالیہ دنوں میں جرمنی میں ہجوم پر گاڑی چڑھانے کا یہ تیسرا واقعہ ہے، جس نے عوام میں شدید خوف و ہراس پھیلایا ہے۔ پولیس اور سیکیورٹی ادارے اس قسم کے واقعات کی روک تھام کے لیے اضافی اقدامات اٹھانے کی کوشش کر رہے ہیں۔مقامی حکام نے عوام سے اپیل کی ہے کہ وہ احتیاطی تدابیر اختیار کریں اور اگر ان کے پاس اس واقعے سے متعلق کوئی معلومات ہیں تو پولیس سے رابطہ کریں۔