السی کے بیج سے زیادہ سے زیادہ فوائد حاصل کرنے کے لیے کب اور کیسے استعمال کریں؟ مکمل رہنمائی

سپر فوڈ السی (فلیکس سیڈ) کے بیج صحت کے لیے بے حد مفید سمجھے جاتے ہیں، لیکن ماہرین کا کہنا ہے کہ ان کا صحیح طریقے سے استعمال نہ کیا جائے تو جسم کو مکمل غذائیت حاصل نہیں ہو پاتی۔

تحقیق کے مطابق، ثابت السی کے بیجوں کا چھلکا سخت ہوتا ہے جو اکثر ہضم نہیں ہوتا، اس لیے یہ بغیر ٹوٹے اور ہضم ہوئے نظامِ ہاضمہ سے گزر سکتے ہیں اور ان کے غذائی اجزاء جسم تک نہیں پہنچ پاتے۔اس لیے زیادہ فوائد حاصل کرنے کے لیے السی کو ہمیشہ پیس کر استعمال کرنا بہتر ہے۔  ماہرین کے مطابق، السی اومیگا تھری فیٹی ایسڈ (ALA)، فائبر، اور طاقتور اینٹی آکسیڈنٹس سے بھرپور ہوتی ہے۔یہ دل کی صحت بہتر بنانے، سوزش کم کرنے، دماغی کارکردگی بڑھانے، کولیسٹرول متوازن رکھنے، اور ہاضمہ درست رکھنے میں مددگار ثابت ہوتی ہے۔  
فائبر کی زیادہ مقدار پیٹ بھرنے کا احساس بڑھاتی ہے، جس سے وزن کنٹرول میں مدد ملتی ہے۔  
استعمال کا درست طریقہ

السی کو کافی گرائنڈر یا فوڈ پروسیسر میں پیس کر استعمال کریں۔  پسی ہوئی السی کو ہوا بند ڈبے میں فریج یا فریزر میں رکھیں کیونکہ یہ جلد خراب ہو سکتی ہے۔  السی کو پانی میں رات بھر بھگو کر استعمال کیا جا سکتا ہے، اس سے جیلی جیسا مادہ بنتا ہے جو معدے اور آنتوں کی صحت کے لیے مفید ہے۔

کتنی مقدار مناسب ہے؟

روزانہ ایک سے دو کھانے کے چمچ پسی ہوئی السی کا استعمال محفوظ سمجھا جاتا ہے۔  صبح نہار منہ نیم گرم پانی کے ساتھ پسی ہوئی السی استعمال کرنے سے ہاضمہ بہتر ہوتا ہے۔  کھانے سے پہلے ایک چمچ لینے سے پیٹ بھرنے کا احساس بڑھتا ہے۔

استعمال کے آسان طریقے

السی کو اسموتھی، پین کیک، یا بریڈ میں شامل کریں۔  دہی، دلیہ، یا سلاد پر چھڑک کر استعمال کریں۔  السی کے تیل کو سلاد ڈریسنگ میں استعمال کریں، لیکن زیادہ آنچ پر پکانے سے گریز کریں۔