حکومت نے سوشل میڈیا پر سمگل شدہ سامان فروخت کرنے والوں کے خلاف سخت کارروائی کرنے کا فیصلہ کر لیا ہے۔
ذرائع کے مطابق یکم جنوری سے نان کسٹم پیڈ یا سمگل شدہ اشیاء کی فروخت کی نگرانی کی جائے گی اور فروخت کرنے والوں کا ڈیٹا جمع کیا جائے گا۔
مانیٹرنگ کا دائرہ:
سوشل میڈیا پر سمگل شدہ الیکٹرونکس، گھریلو آلات، جوتے، کپڑے، میک اپ کا سامان، کمبل، چادریں، قالین، ٹائر، گاڑی کے پرزہ جات، لیپ ٹاپ، کروم بکس، کمپیوٹرز، چولہے، کوکنگ رینج، اون، کراکری، جوسر، چاپرز، ڈرائی فروٹس، ٹن فوڈز، جام اور جلی بیچنے والوں کے خلاف کارروائی ہوگی۔
ڈیٹا جمع کرنا:
سمگل شدہ سامان بیچنے والوں کے موبائل نمبرز، ای میلز، اور دیگر شناختی معلومات اکٹھی کی جائیں گی۔
نادرا اور ایف بی آر کی مدد:
سمگل شدہ سامان کے بیچنے والوں کی شناخت کے لیے نادرا سے معلومات حاصل کی جائیں گی جبکہ ایف بی آر کے ٹولز سے ان کی ٹریسنگ کی جائے گی۔
نوٹس اور قانونی کارروائی:
ڈیٹا اکٹھا کرنے کے بعد سمگل شدہ سامان بیچنے والوں کو نوٹس جاری کیے جائیں گے اور قانونی کارروائی عمل میں لائی جائے گی۔اس اقدام کا مقصد سوشل میڈیا پر غیر قانونی اور نان کسٹم پیڈ سامان کی فروخت کو روکنا اور ملکی معیشت اور کسٹمز قوانین کی پاسداری کو یقینی بنانا ہے۔
