بالی ووڈ سپر اسٹار سلمان خان کے ریئلٹی شو 'بگ باس 19' کو قانونی چیلنج کا سامنا ہے، جب فوٹو گرافک پرفارمنس لمیٹڈ (PPL) نے پروڈیوسرز کو دو کروڑ روپے کے ہرجانے کا نوٹس بھیجا۔
کمپنی کا الزام ہے کہ شو میں 'چکنی چمیلی' اور 'دھت تیری کی' سمیت متعدد گانے استعمال کیے گئے بغیر پبلک پرفارمنس لائسنس حاصل کیے۔ PPL نے 19 ستمبر کو اینڈیمول شائن انڈیا، ڈائریکٹرز تھامس گوسیٹ، نکولس چزارین اور دیپک دھر کو نوٹس بھیجا، جس میں نہ صرف لائسنس فیس کی ادائیگی بلکہ دو کروڑ روپے ہرجانے کا مطالبہ بھی شامل ہے۔یہ نوٹس شو کے عروج کے دوران موصول ہوا، جس میں مشہور شخصیات جیسے اشنور کور، ذیشان قادری، تانیا متل اور آویز دربار حصہ لے رہی ہیں۔ ماہرین کے مطابق یہ واقعہ انڈین ٹی وی پروڈکشنز کے لیے انتباہ ہو سکتا ہے کہ وہ میوزک کے استعمال سے قبل قانونی تقاضے پورے کریں۔سلمان خان کی میزبانی میں چلنے والا یہ شو اپنے 19ویں سیزن میں ہے اور بھارت کے مقبول ترین ریئلٹی شوز میں شمار ہوتا ہے۔ اب دیکھنا یہ ہے کہ پروڈیوسرز اس قانونی چیلنج کا کیسے مقابلہ کرتے ہیں اور آیا یہ شو کے شیڈول پر اثر انداز ہوگا۔
