اداکار عدنان صدیقی فضائی حادثے سے بچ گئے، الوداعی پیغام بھی لکھا تھا

لاہور کے آسمان پر طوفان میں پھنس کر جان بچانے والی پرواز کے مسافر، اداکار عدنان صدیقی نے انسٹاگرام پر اپنے خوفناک تجربے کا تفصیلی بیان دے دیا۔

24 مئی کو کراچی سے لاہور جانے والی پرواز میں سوار اداکار عدنان صدیقی نے اپنے انسٹاگرام پوسٹ میں بتایا کہ کیسے وہ زندگی اور موت کے درمیان کھڑے ہو گئے۔ طیارے کو شدید جھٹکے لگنے کے دوران مسافروں میں خوف و ہراس پھیل گیا، لوگ چیخ رہے تھے اور آنکھوں میں آنسو تھے۔ اداکار نے ایک الوداعی پیغام بھی لکھا جسے انہوں نے لینڈنگ کے بعد ڈیلیٹ کر دیا۔انہوں نے پائلٹ کی ہمت اور مہارت کی تعریف کی کہ جب جہاز لاہور کی زمین پر آ رہا تھا، اچانک تیز جھٹکے کے باعث دوبارہ آسمان کی طرف بلند ہو گیا، جس سے طیارہ حادثے سے بچ گیا۔

عدنان صدیقی نے اس واقعے کو اللہ کا کرم اور زندگی کا قیمتی سبق قرار دیا اور لوگوں کو ہر لمحے کی قدر کرنے کی تلقین کی۔طوفان کی شدت کے باعث 57 مسافروں نے دوبارہ سفر کرنے سے انکار کیا، جبکہ ائیرپورٹ پر ان کے سامان کی واپسی میں تاخیر بھی ہوئی۔ اس حادثے نے مسافروں کو زندگی کی نزاکت کا احساس دلایا اور انہیں اپنی حفاظت اور پیاروں کی اہمیت کا درس دیا۔