ایران نے اپنے جوہری پروگرام پر مغرب کے ساتھ بات چیت کے لیے رضا مندی ظاہر کی ہے، اور یہ بات چیت 29 نومبر کو برطانیہ، فرانس، اور جرمنی کے نائب وزرائے خارجہ کے ساتھ ہوگی۔
ایرانی وزارتِ خارجہ کے ترجمان اسماعیل بقائی نے اس بات کا اعلان کیا کہ مذاکرات جوہری پروگرام اور خطے کی موجودہ صورتِ حال پر تبادلہ خیال کے لیے ہوں گے۔ایرانی حکام نے اس بات چیت کا مقام تو نہیں بتایا، لیکن جاپان کے خبر رساں ادارے کی رپورٹ میں کہا گیا تھا کہ یہ مذاکرات ممکنہ طور پر 29 نومبر کو جنیوا میں ہوں گے۔یہ پیش رفت عالمی جوہری ادارے (IAEA) کی ایران کے حوالے سے منظور کردہ ایک قرارداد کے بعد سامنے آئی ہے، جس میں ایران کی جوہری سرگرمیوں کے بارے میں بین الاقوامی نگرانی کی اہمیت پر زور دیا گیا تھا۔
ایران اور مغربی ممالک کے درمیان طویل عرصے سے جاری تنازعات اور ایران کے جوہری پروگرام پر عالمی تحفظات کے باوجود، یہ مذاکرات ایک اہم پیشرفت کے طور پر سامنے آئے ہیں۔یہ مذاکرات مغرب کے ساتھ ایران کے تعلقات کو بہتر بنانے اور جوہری پروگرام کے حوالے سے عالمی تحفظات کو دور کرنے کی ایک کوشش سمجھی جا رہی ہے، اور ان مذاکرات کے نتائج عالمی سطح پر اہمیت کے حامل ہوں گے۔
