لاہور کی سگیاں مویشی منڈی میں عیدالاضحیٰ کی آمد کے ساتھ ہی سرگرمیاں عروج پر پہنچ گئی ہیں، جہاں قربانی کے جانوروں کی خرید و فروخت کا سلسلہ بھرپور انداز میں جاری ہے۔
منڈی میں شہریوں کی بڑی تعداد اپنے اہل خانہ کے ہمراہ پہنچ رہی ہے اور سنت ابراہیمی کی ادائیگی کے لیے خوبصورت اور صحت مند جانوروں کا انتخاب کیا جا رہا ہے۔ بکرے، دنبے، چھترے، بیل اور اونٹ خریداروں کی خصوصی توجہ کا مرکز بنے ہوئے ہیں، جبکہ منڈی کا ماحول گہما گہمی اور شور و غل سے بھرپور ہے۔بیوپاریوں اور خریداروں کے درمیان قیمتوں پر سخت بھاؤ تاؤ جاری ہے۔ شہریوں کا کہنا ہے کہ ہر سال کی طرح اس بار بھی قربانی کے جانور پچھلے سال کی نسبت مہنگے ہیں، جس کی وجہ مہنگائی اور بڑھتے ہوئے اخراجات ہیں۔ تاہم وہ مناسب دام پر جانور خریدنے کی کوشش کر رہے ہیں۔
دوسری جانب بیوپاریوں کا مؤقف ہے کہ مویشیوں کی پرورش، چارے اور ٹرانسپورٹ کے اخراجات میں نمایاں اضافہ ہوا ہے، جس کی وجہ سے قیمتیں بھی زیادہ ہیں۔ ان کا کہنا ہے کہ وہ مقررہ نرخوں پر نہیں بلکہ گاہکوں سے براہ راست بھاؤ تاؤ کے بعد جانور فروخت کر رہے ہیں۔منڈی میں سیکیورٹی اور انتظامی صورتحال کو بھی بہتر بنانے کے لیے متعلقہ ادارے متحرک ہیں تاکہ خریداروں کو کسی قسم کی مشکلات کا سامنا نہ ہو۔ عید کے قریب آنے کے ساتھ ساتھ منڈی میں رش مزید بڑھنے کی توقع ہے۔
