اسرائیلی وزیراعظم بنیامین نیتن یاہو نے دعویٰ کیا ہے کہ ایران نے ان کے ایک بیٹے کو قتل کرنے کی کوشش کی تھی۔
نیتن یاہو نے ایک اسرائیلی ٹی وی کو دیے گئے انٹرویو میں کہا کہ ان کے خاندان کو سکیورٹی فراہم کرنے کا یہ اقدام اس لیے ضروری ہے کیونکہ ان کے بیٹے کو مبینہ طور پر ایران کی طرف سے نشانہ بنایا گیا ہے۔انہوں نے مزید تفصیلات فراہم کرنے سے انکار کرتے ہوئے کہا کہ یہ سکیورٹی اقدامات کسی عیاشی کی نہیں بلکہ خاندان کے تحفظ کے لیے ہیں۔ نیتن یاہو کا یہ بیان ایسے وقت سامنے آیا ہے جب اسرائیل اور ایران کے درمیان کشیدگی شدید تر ہوتی جارہی ہے۔رپورٹس کے مطابق، یہ سکیورٹی فراہم کرنے کا معاہدہ اسرائیلی خفیہ ادارہ شن بیت کے ساتھ ہوا ہے، جس کے تحت نیتن یاہو کے بیٹوں اور اہلیہ کو کم از کم پانچ سال تک سکیورٹی فراہم کی جائے گی، چاہے وہ آئندہ انتخابات میں کامیاب ہوں یا نہ ہوں۔
یہ واضح نہیں کہ نیتن یاہو کے کس بیٹے کو مبینہ طور پر نشانہ بنایا گیا ہے۔ ان کے بیٹے ایونر اسرائیل میں رہتے ہیں، جبکہ دوسرے بیٹے یائر زیادہ تر وقت امریکا میں گزارتے ہیں۔یہ بیان ایسے وقت سامنے آیا ہے جب ایران اور اسرائیل کے درمیان کشیدگی بڑھتی جارہی ہے اور دونوں طرف سے ایک دوسرے پر الزامات عائد کیے جا رہے ہیں۔ ایرانی حکومت کی طرف سے اس دعوے یا کوشش کی تصدیق یا تفصیلات سامنے نہیں آئیں۔
