ہم ایک خاندان ہیں ‘ ہمیں مل کر آگے بڑھنا چاہیے:اسحاق ڈار

  جب ایک بار معاملہ حل ہو جائے تو اسلام بھی کہتا ہے  دل صاف رکھیں:میڈیا سے گفتگو 
اسلام آباد (آئی این پی)نائب وزیر اعظم و وزیر خارجہ اسحاق ڈار نے پاکستان اور بنگلادیش کے درمیان تعلقات کے حوالے سے کہا ہے  ہم ایک خاندان ہیں اور ہمیں مل کر آگے بڑھنا چاہیے ۔ڈھاکا میں میڈیا سے گفتگو کے دوران ایک بنگالی صحافی کی جانب سے 1971 سے متعلق سوال کے جواب میں وزیر خارجہ اسحاق ڈار  نے کہا   آپ کے سوال کے بارے میں میرے عزیز بھائی دیکھیں،  1974 میں پہلی بار یہ معاملہ تحریری طور پر حل ہوا تھا اور وہ دستاویز تاریخی ہے اور دونوں ملکوں کے پاس موجود ہے جبکہ اس کے بعد سابق صدر جنرل (ر )مشرف یہاں (ڈھاکا) آئے اور بہت کھلے دل سے اس مسئلے پر بات کی۔نائب وزیر اعظم  نے کہا کہ  میرا ماننا ہے جیسے خاندان یا بھائیوں کے درمیان ہوتا ہے اور ہم بھی ایک خاندان ہیں ، ہمیں مل کر آگے بڑھنا چاہیے تاکہ دونوں ملکوں کے عوام کے لیے بہترین کام کیا جا سکے۔  جب ایک بار معاملہ حل ہو جائے تو اسلام بھی کہتا ہے کہ دل صاف رکھیں ۔