پاکستان اسٹاک ایکسچینج میں استحکام برقرار رہا اور تبادلہ مارکیٹ میں ڈالر کی قیمت میں کمی کے باعث روپے کی قدر میں اضافہ ہوا۔
کاروباری ہفتے کے تیسرے روز اسٹاک مارکیٹ میں آغاز ہی سے تیزی دیکھی گئی۔ پہلے سیشن میں 100 انڈیکس میں 376 پوائنٹس کا اضافہ ریکارڈ کیا گیا، جس کے بعد انڈیکس 1 لاکھ 71 ہزار 450 پوائنٹس پر پہنچ گیا۔ گزشتہ روز بھی مارکیٹ میں تیزی رہی تھی اور انڈیکس بلند ترین سطح پر گیا، تاہم کاروبار کے اختتام پر معمولی کمی دیکھی گئی تھی۔
دوسری جانب امریکی ڈالر کی قیمت میں کمی جاری ہے۔ انٹر بینک میں ڈالر 4 پیسے کم ہو کر 280 روپے 17 پیسے پر آ گیا، جس سے ملکی کرنسی کی مضبوطی میں اضافہ ہوا۔تجزیہ کاروں کے مطابق مارکیٹ میں استحکام اور روپے کی مضبوطی کا تعلق ملک میں مالی اور اقتصادی سرگرمیوں میں بہتری اور ڈالر کی طلب میں کمی سے ہے۔
