ویب ڈیسک: عوامی مسلم لیگ کے سربراہ شیخ رشید احمد نے پاکستان کی موجودہ سیاسی اور معاشی صورتحال پر شدید تشویش کا اظہار کیا ہے۔
انسداد دہشت گردی عدالت کے باہر میڈیا سے گفتگو کرتے ہوئے انہوں نے حکومت کو سپورٹ دینے والوں کو تنقید کا نشانہ بناتے ہوئے کہا کہ انہیں سوچنا چاہیے، کیونکہ یہ لوگ حکومت کو لے ڈوبیں گے۔شیخ رشید نے اپنے تجربات کا حوالہ دیتے ہوئے کہا کہ انہوں نے 40 دن کا چلہ کاٹا ہے اور اس دوران دو بار جیل بھی گئے۔ انہوں نے کہا کہ مذاکرات کرنے کی ضرورت ہے، انتقام کی طرف نہیں جانا چاہیے۔ ان کا کہنا تھا کہ جیلوں کے دروازے کھولے جائیں اور جو غریب لوگ جیلوں میں ہیں، انہیں رہا کیا جائے۔ انہوں نے اس بات پر بھی زور دیا کہ ایک جوڈیشل کمیشن بنایا جائے تاکہ جیلوں میں موجود بے گناہ افراد کی حالت کا جائزہ لیا جا سکے۔
شیخ رشید نے مزید کہا کہ پاکستان کی معیشت اور سرمایہ کاری کے حوالے سے خطرات بڑھ رہے ہیں اور ایسا ماحول بن رہا ہے کہ پاکستان اقتصادی بحران میں داخل ہو سکتا ہے۔ ان کا کہنا تھا کہ اسٹاک ایکسچینج کی صورتحال عام آدمی سے پوچھیں، کیونکہ اس وقت ملک کی معیشت شدید مشکلات کا سامنا کر رہی ہے۔سابق وفاقی وزیر نے حکومتی اقدامات پر سوال اٹھایا اور کہا کہ حکومت کے پاس عوام کی حمایت نہیں ہے اور جو سپورٹ ہے، وہ بھی اس حکومت کو لے ڈوبے گی۔ ان کا یہ بھی کہنا تھا کہ اگر حکومت نے فوری طور پر فیصلے نہ کیے تو عالمی دباؤ نہ صرف حکومت بلکہ پاکستان کے خلاف بھی بڑھ جائے گا۔
شیخ رشید نے یہ بھی کہا کہ آنے والے ہفتوں میں کچھ اہم فیصلے کیے جانے کی ضرورت ہے، ورنہ عالمی دباؤ مزید بڑھ جائے گا۔ انہوں نے عوامی سطح پر اپیل کی کہ جیلوں کے دروازے کھولے جائیں اور غریبوں کو رہا کیا جائے تاکہ ملک کی موجودہ سیاسی و اقتصادی صورت حال کو بہتر بنایا جا سکے۔
