یونان کے جنوبی جزیرے کریٹ میں جمعرات کی صبح ایک طاقتور زلزلہ آیا، جس کی شدت 6.1 ریکارڈ کی گئی۔
زلزلے کا مرکز ایلونڈا کے شمال مشرق میں 58 کلومیٹر دور سمندر میں تھا، اور اس کی گہرائی 69 کلومیٹر تھی۔ زلزلے کے جھٹکے کریٹ، سانتورینی، ترکی، اسرائیل اور دیگر قریبی علاقوں میں بھی محسوس کیے گئے۔یورپی-میڈیٹرینین سیسمولوجیکل سینٹر (EMSC) نے سونامی کا خدشہ ظاہر کرتے ہوئے یونان، ترکی، اٹلی، فرانس اور پرتگال کے شہریوں کو مقامی حکام کی ہدایات پر عمل کرنے کی تاکید کی ہے۔ یونانی حکام نے فوری طور پر ساحلی علاقوں میں رہائش پذیر افراد کو محفوظ مقامات پر منتقل ہونے کی ہدایت دی۔ تاہم، ابتدائی اطلاعات کے مطابق کسی جانی یا مالی نقصان کی اطلاع نہیں ملی ہے۔
یونان میں زلزلے معمول کا حصہ ہیں، کیونکہ یہ ملک کئی بڑی فالٹ لائنز پر واقع ہے۔ حکام نے عوام سے اپیل کی ہے کہ وہ سرکاری ذرائع سے معلومات حاصل کریں اور افواہوں سے گریز کریں۔زلزلے کے بعد، کریٹ میں ہنگامی سروسز کو الرٹ کر دیا گیا ہے تاکہ کسی بھی ممکنہ ہنگامی صورتحال سے نمٹا جا سکے۔علاقے میں موجود افراد سے گزارش ہے کہ وہ مقامی حکام کی ہدایات پر عمل کریں اور ساحلی علاقوں سے دور رہیں۔
