قصور: شادی کی تقریب سے واپس آنے والے باراتیوں کا کیری ڈبہ کھارا چوک کے قریب نالے میں گر گیا، جس کے نتیجے میں ایک ہی خاندان کے 8 افراد جاں بحق جبکہ 2 شدید زخمی ہو گئے۔
حادثے کی تفصیلات
ابتدائی اطلاعات کے مطابق حادثہ ڈرائیور کی غفلت کے باعث پیش آیا، جو مبینہ طور پر نیند کے باعث گاڑی پر قابو نہ رکھ سکا۔ جاں بحق ہونے والوں میں 30 سالہ لائیبہ، 35 سالہ عمران، 38 سالہ سلیمان، 25 سالہ سنی، 35 سالہ مقصود اور دو نامعلوم افراد شامل ہیں۔ریسکیو ٹیموں نے موقع پر پہنچ کر زخمیوں کو قریبی ہسپتال منتقل کیا، جہاں ان کی حالت تشویشناک بتائی جا رہی ہے۔ پولیس کے مطابق تمام افراد شادی کی تقریب سے واپس آ رہے تھے کہ حادثہ پیش آیا۔
حکام کا ردعمل
پولیس نے حادثے کی تحقیقات کا آغاز کر دیا ہے جبکہ جاں بحق افراد کے اہل خانہ کو اطلاع دے دی گئی ہے۔ علاقے میں سوگ کا سماں ہے اور اہل علاقہ نے حکومت سے مطالبہ کیا ہے کہ ڈرائیوروں کی نیند اور لاپرواہی کے باعث ہونے والے حادثات کو روکنے کے لیے مؤثر اقدامات کیے جائیں۔
