دبئی کے معروف تاجر اور عزیزی گروپ آف کمپنیز کے چیئرمین میرویس عزیزی نے اپنی بیٹی فرشتہ جان عزیزی کی یاد میں ایک اہم اقدام اٹھایا ہے، جس کے تحت انہوں نے کینسر ہسپتال اور تحقیقی مرکز بنانے کے لیے 3 بلین ڈالر (تقریباً 228 ارب روپے) کا عطیہ دیا ہے۔
یہ ہسپتال کینسر کے مریضوں کے لیے مفت علاج فراہم کرے گا۔فرشتہ جان عزیزی گزشتہ سال کینسر کے مرض میں مبتلا ہو کر انتقال کر گئی تھیں، اور ان کی یاد میں یہ عطیہ دیا گیا ہے تاکہ ضرورت مند مریضوں کو بہترین طبی سہولتیں فراہم کی جا سکیں۔ میرویس عزیزی نے اس عطیے کا باضابطہ اعلان دبئی میں منعقد ہونے والے 5ویں عرب ہوپ میکرز ایونٹ میں کیا۔اس اقدام کا مقصد یہ ہے کہ کینسر کے مریضوں کو مفت اور سستا علاج فراہم کیا جائے، تاکہ زیادہ سے زیادہ افراد اس مرض سے لڑنے کے لیے مدد حاصل کر سکیں۔ ہسپتال کی تعمیر کا عمل اس سال شروع ہوگا، اور اس کی ترقی اور مقام کے بارے میں مزید تفصیلات دبئی کے حکام کی جانب سے فراہم کی جائیں گی۔یہ اقدام "فادرز اینڈومنٹ" پروگرام کا بھی حصہ ہے، جو شیخ محمد بن راشد المکتوم، نائب صدر اور وزیر اعظم متحدہ عرب امارات اور دبئی کے حکمران کے ذریعے شروع کیا گیا تھا۔ اس پروگرام کا مقصد پائیدار انسان دوستی کے ذریعے باپوں کی عزت افزائی کرنا ہے۔
