افغانستان: طالبان کے دور اقتدارمیں صحافیوں پر سختیاں، سنسرشپ ، گرفتاریاں بڑھ گئیں

2024 میں میڈیا کے خلاف خلاف ورزیوں میں 24فیصد اضافہ ہوا،، 181صحافیوں کے حقوق پائمال کیے گئے،رپورٹ 
 کابل (آئی این پی )افغانستان میں طالبان کے اقتدار سنبھالنے کے بعد صحافیوں اور میڈیا اداروں پر پابندیاں مزید سخت ہو گئیں۔ صحافیوں کو سخت سنسرشپ، دھمکیوں اور گرفتاریوں کا سامنا ہے، جس کے باعث آزادی صحافت شدید خطرے میں پڑ گئی ہے۔افغانستان جرنلسٹس سینٹر کی تازہ رپورٹ کے مطابق 2024 میں میڈیا کے خلاف خلاف ورزیوں میں 24 فیصد اضافہ ہوا، جس میں 181 صحافیوں کے حقوق پائمال کیے گئے۔رپورٹ کے مطابق 131 صحافیوں کو دھمکیاں دی گئیں۔ 50 صحافیوں کو گرفتار کیا گیا، جن میں سے 10 اب بھی جیل میں ہیں، جبکہ 4 کو 2 سے 3 سال قید کی سزا دی گئی ہے۔22 سے زائد میڈیا اداروں کو بند یا معطل کر دیا گیا ہے۔دوسری جانب ایمنسٹی انٹرنیشنل نے طالبان سے آزادی اظہار اور صحافیوں پر جبر کے خاتمے کا مطالبہ کیا ہے، مگر افغان میڈیا مسلسل دبائو میں ہے۔ صحافیوں پر حملے، دفاتر پر چھاپے اور سنسرشپ کی سختیاں افغان صحافت کے لیے ایک سیاہ باب بن چکی ہیں۔