شام کے شہر حلب کے علاقے الحلاق میں مسلح افراد نے ایک سونا کی دکان پر دھاوا بول کر دکاندار اور اس کے بھائی کو موت کے گھاٹ اتار دیا اور بڑی مقدار میں سونا لے کر فرار ہوگئے۔
واقعہ منگل کو پیش آیا۔عینی شاہدین کے مطابق حملہ آور اچانک دکان میں داخل ہوئے اور اندھا دھند فائرنگ شروع کردی، جس کے نتیجے میں دونوں افراد موقع پر ہی جاں بحق ہوگئے۔ فائرنگ کے بعد علاقے میں شدید خوف و ہراس پھیل گیا اور دیگر دکانداروں نے اپنی دکانیں بند کر دیں۔پولیس اور امدادی ٹیمیں فوری طور پر جائے وقوعہ پر پہنچ گئیں اور تحقیقات کا آغاز کیا گیا۔ ابتدائی اطلاعات کے مطابق حملہ آوروں کی شناخت تاحال نہیں ہو سکی، تاہم پولیس سی سی ٹی وی فوٹیج اور دیگر شواہد کی مدد سے ملزمان کا سراغ لگانے کی کوشش کر رہی ہے۔واقعے نے مقامی آبادی میں تشویش پیدا کر دی ہے، اور شہریوں نے سکیورٹی بہتر بنانے اور ملزمان کی فوری گرفتاری کا مطالبہ کیا ہے۔
