مائیکروسافٹ کا دعویٰ ہے کہ کام کی جگہ پر صرف انسانوں کی ہی نگرانی اور انتظام ضروری نہیں بلکہ مصنوعی ذہانت (اے آئی) کو بھی ایک مینیجر کی ضرورت ہے۔
اس حوالے سے کمپنی نے منگل کو جدید سافٹ ویئر 'مائیکرو سافٹ ایجنٹ 365' کا اعلان کیا، جس کا مقصد 1.3 ارب سے زائد ایجنٹس کی نگرانی کرنا ہے۔ مائیکرو سافٹ کا اندازہ ہے کہ 2028 تک یہ ایجنٹس دفتری کام خودکار طریقے سے انجام دے رہے ہوں گے۔ایجنٹس ایسے مصنوعی ذہانت سے چلنے والے پروگرامز ہوتے ہیں جو انسانوں کی طرف سے مختلف نوعیت کے کام انجام دیتے ہیں۔ یہ سافٹ ویئر اور ایسے دیگر سافٹ ویئر، جو اس قسم کے ایجنٹس کو استعمال کرتے ہیں، مارکیٹ میں تیزی سے مقبول ہو رہے ہیں۔ کچھ صارفین نے کوڈ جنریشن اور دیگر کاموں کے لیے ان سسٹمز کا کامیابی سے استعمال کیا ہے، لیکن بعض دیگر صارفین کو ان کے نفاذ میں مشکلات کا سامنا ہے، جس سے شعبے میں ممکنہ خلا کا خدشہ پیدا ہو رہا ہے۔
مائیکروسافٹ کے مطابق، بالکل اسی طرح جیسے آئی ٹی عملہ دیکھ سکتا ہے کہ کون سی کمپنی کے نیٹ ورک پر کون موجود ہے اور وہ کن وسائل تک رسائی رکھتا ہے، ویسے ہی اس کا نیا سافٹ ویئر اے آئی ایجنٹس کی نگرانی کے لیے بھی ایسا ہی کنٹرول فراہم کرے گا۔اس پروگرام کا مقصد آئی ٹی اہلکاروں کو 'باغی' یا غیر مجاز ایجنٹس کو الگ کرنے، ان کی شناخت کرنے اور مجاز ایجنٹس کو مختلف پیداواریت کے ٹولز فراہم کرنے کی سہولت دینا ہے، تاکہ کام کی جگہ پر ڈیجیٹل نگرانی اور کنٹرول بہتر طریقے سے ممکن ہو سکے۔
