ویب ڈیسک: وفاقی حکومت کی جانب سے دائر نظرثانی درخواست اور پاور ڈویژن کے اعتراضات کے باوجود نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے لیے 2023ء سے 2030ء تک کا ملٹی ایئر ٹیرف (Multi-Year Tariff) نوٹیفائی کر دیا ہے۔
نیپرا نے کے الیکٹرک کے لیے بجلی کی فراہمی، ترسیل اور تقسیم کے نرخ الگ الگ مقرر کرتے ہوئے کہا ہے کہ:
پاور سپلائی (Supply) کا اوسط ٹیرف: 39.97 روپے فی یونٹ
ڈسٹری بیوشن ٹیرف: 3 روپے 31 پیسے فی یونٹ
ترسیلی ٹیرف (Transmission): 2 روپے 86 پیسے فی یونٹ
وفاقی حکومت کی طرف سے نیپرا کے ملٹی ایئر ٹیرف فیصلے کے خلاف نظرثانی کی اپیل کی گئی تھی۔ پاور ڈویژن نے کے الیکٹرک کو دی گئی بعض خصوصی رعایتوں پر شدید تحفظات کا اظہار کیا تھا۔تاہم نیپرا نے وفاقی حکومت کی درخواست پر کسی فیصلے کا انتظار کیے بغیر یہ نوٹیفکیشن جاری کر دیا، جس سے پاور ڈویژن اور وفاق کے موقف کو نظرانداز کیے جانے کا تاثر پیدا ہوا ہے۔یہ پیش رفت ایسے وقت پر سامنے آئی ہے جب بجلی کی قیمتوں میں اضافے سے صارفین پہلے ہی شدید معاشی دباؤ کا شکار ہیں، اور نیپرا کا یہ فیصلہ مستقبل میں بجلی کے نرخوں اور حکومتی پالیسیوں پر مزید بحث کا باعث بن سکتا ہے۔
