کامن ویلتھ رپورٹ نے انتخابی دھاندلی کا پول کھول دیا:عمران خان

سب متحد رہیں ‘ظلم کا نظام زیادہ دیر  نہیں رہے گا، آپ حق پر ہیں‘ حق و سچ انسان کو بہادر بناتا ہے
دھاندلی پر قائم حکومت کو قانونی طور پر قبول کرنے کا وقت اب ختم ہو چکا ہے: وکلاء  اور فیملی سے گفتگو 
راولپنڈی(آئی این پی )بانی پی ٹی آئی  عمران خان  نے کہا ہے کہ کامن ویلتھ کی 8 فروری کے الیکشن پر لیک ہونے والی  رپور  ٹ  نے بھی انتخابی دھاندلی کا پول کھول دیا   کہ کیسے بے شرمی اور ڈھٹائی سے ہمارا مینڈیٹ چوری کیا گیا۔ راولپنڈی کی اڈیالہ جیل میں وکلا اور فیملی سے گفتگو کرتے ہوئے انہوں نے کہا کہ کامن ویلتھ کے مطابق یہ رپورٹ پہلے ہی سرکاری سطح پر حکومت پاکستان کو دے دی گئی تھی مگر یہاں سکندر سلطان راجہ جیسے بے ضمیر لوگ ہیں جنہوں نے انتخابی چوری کی سہولت کاری سمیت اس پر پردہ ڈالنے میں بھی بھرپور کردار ادا کیا،  اب دھاندلی پر قائم حکومت کو قانونی طور پر قبول کرنے کا وقت اب ختم ہو چکا ہے اسی لئے سینیٹ اور پارلیمانی کمیٹیوں سے استعفے دئیے گئے ہیں‘اپنے ارکان پارلیمنٹ کو پیغام دینا چاہتا ہوں  بالکل نہ گھبرائیں نہ ہی جیل سے گھبرائیں‘ اپنی تمام پارٹی کو کہتا ہوں کہ آپ سب متحد رہیں ظلم کا نظام زیادہ دیر قائم نہیں رہے گا، آپ حق پر ہیں اور حق و سچ انسان کو بہادر بناتا ہے اور حق کی ہی فتح ہوتی ہے۔