بھارتی کرکٹ ٹیم کے کپتان روہت شرما کے ون ڈے مستقبل کے حوالے سے بھارتی میڈیا میں قیاس آرائیوں کا سلسلہ تیز ہو گیا ہے۔
انگلینڈ کے خلاف دوسرے ون ڈے میں 26 رنز کی مختصر اننگز کے بعد مختلف رپورٹس میں دعویٰ کیا جا رہا ہے کہ 19 جولائی کو کھیلا جانے والا تیسرا اور آخری ون ڈے ان کے کیریئر کا آخری میچ ثابت ہو سکتا ہے۔بھارتی میڈیا رپورٹس کے مطابق بھارتی کرکٹ بورڈ کی سلیکشن کمیٹی مستقبل کی منصوبہ بندی کے تحت نوجوان کھلاڑیوں کو زیادہ مواقع دینے پر غور کر رہی ہے۔ رپورٹس میں کہا گیا ہے کہ اوپننگ بلے باز یشسوی جیسوال کو ٹیم میں مستقل موقع دینے کی حکمت عملی پر کام کیا جا رہا ہے۔کچھ رپورٹس میں دعویٰ کیا گیا ہے کہ سلیکٹرز نے روہت شرما کو آگاہ کر دیا ہے کہ انگلینڈ کے دورے کے بعد وہ مستقبل کے منصوبوں کا حصہ نہیں ہیں اور ٹیم نئی قیادت اور نوجوان کھلاڑیوں کے ساتھ آگے بڑھنا چاہتی ہے۔ یہ بھی کہا جا رہا ہے کہ ہیڈ کوچ گوتم گمبھیر کو اس مؤقف سے آگاہ کر دیا گیا ہے۔بھارتی میڈیا کے مطابق روہت شرما ٹیم میں اپنی جگہ برقرار رکھنا چاہتے تھے، تاہم مستقبل کے حوالے سے حتمی فیصلہ اب ان کے اپنے ہاتھ میں ہے۔
اعداد و شمار کے مطابق روہت شرما نے اپنے گزشتہ آٹھ ون ڈے میچز میں مجموعی طور پر 241 رنز بنائے ہیں، جن میں صرف ایک نصف سنچری شامل ہے۔ دوسری جانب نوجوان بلے باز یشسوی جیسوال شاندار فارم میں ہیں اور اپنی حالیہ تین اننگز میں دو سنچریاں اسکور کر چکے ہیں۔رپورٹس میں یہ بھی دعویٰ کیا گیا ہے کہ سلیکشن کمیٹی اور روہت شرما کے درمیان ٹیسٹ کرکٹ سے ریٹائرمنٹ کے معاملے پر بھی مکمل اتفاقِ رائے نہیں تھا، جبکہ بورڈ کی توجہ آئندہ عالمی کپ کے لیے نئی اور متوازن ٹیم تشکیل دینے پر مرکوز ہے۔تاہم بھارتی کرکٹ بورڈ (بی سی سی آئی) یا روہت شرما کی جانب سے ان رپورٹس کی تاحال باضابطہ تصدیق یا تردید سامنے نہیں آئی، اس لیے ان اطلاعات کو فی الحال میڈیا رپورٹس اور قیاس آرائیوں کے طور پر ہی دیکھا جا رہا ہے۔
