ریو ڈی جنیرو: برازیل کی قومی فٹبال ٹیم شکستوں کے بھنور میں پھنسی ہوئی ہے اور اب اس پر ایک اور بڑا بحران آن کھڑا ہوا ہے، کیونکہ عدالت نے برازیلین فٹبال فیڈریشن (CBF) کے صدر ایڈنارڈو روڈریگز کو ان کے عہدے سے برطرف کر دیا ہے۔
میڈیا رپورٹس کے مطابق، ایڈنارڈو روڈریگز کو عدالتی حکم کے تحت ناقص کارکردگی، انتظامی بدعنوانی، اور مالی بے ضابطگیوں کے الزامات پر ان کے عہدے سے فارغ کیا گیا۔ عدالت نے خاص طور پر فیفا ورلڈ کپ کوالیفائرز میں ٹیم کی خراب کارکردگی اور CBF میں مالی بے قاعدگیوں کو فیصلے کی بنیاد قرار دیا۔ایڈنارڈو روڈریگز نے 2023 میں برازیلین فٹبال فیڈریشن کے صدر کا عہدہ سنبھالا تھا۔ اس سے قبل وہ برازیل کی فٹبال لیگ ٹائٹن کے سربراہ کے طور پر بھی خدمات انجام دے چکے ہیں۔ تاہم ان کے دور میں برازیل کو میدان اور میدان سے باہر دونوں محاذوں پر شدید مشکلات کا سامنا کرنا پڑا۔ان کے دورِ صدارت میں نہ صرف ٹیم کو کوپا امریکا 2024 میں بدترین ناکامی کا سامنا کرنا پڑا بلکہ ٹیم کے کوچز اور کھلاڑیوں سے ان کے تعلقات میں کشیدگی کی اطلاعات بھی منظرعام پر آئیں۔
برازیل کے مداح پہلے ہی ٹیم کی مسلسل ناکامیوں پر مایوس تھے، اب CBF کی اعلیٰ سطحی قیادت میں یہ بحران مزید پریشانی کا باعث بن رہا ہے۔ خدشہ ظاہر کیا جا رہا ہے کہ اس صورتحال کے اثرات فیفا ورلڈ کپ 2026 کے کوالیفکیشن راؤنڈز پر بھی پڑ سکتے ہیں، جہاں برازیل کو پہلے ہی شدید چیلنجز کا سامنا ہے۔ماہرین کا کہنا ہے کہ برازیلین فٹبال کو ان بحرانوں سے نکلنے کے لیے سخت اصلاحاتی اقدامات کی ضرورت ہے، بصورت دیگر دنیا کی سب سے کامیاب فٹبال قوم میں شمار ہونے والی ٹیم کا مستقبل مزید مشکلات کا شکار ہو سکتا ہے۔
