اسرائیل کا ایران پرحملہ غیر ذمہ دارانہ اور خطرناک : وزیراعلیٰ تامل ناڈو

چنئی(آئی این پی ) بھارتی ریاست تامل ناڈو کے وزیر اعلیٰ ایم کے اسٹالن نے اسرائیل کی جانب سے ایران پر کیے گئے حملے کو سخت الفاظ میں تنقید کا نشانہ بنایا ہے۔بھارتی میڈیارپورٹس کے مطابق ریاست تامل ناڈو کے وزیر اعلیٰ ایم کے اسٹالن نے کہا ہے کہ یہ اقدام نہ صرف غیر ذمہ دارانہ ہے بل کہ خطے میں وسیع پیمانے پر جنگ کو ہوا دے سکتا ہے۔انہوں نے کہا کہ دنیا کوغزہ پرمسلسل اسرائیلی بمباری کی سخت مذمت کرنی چاہیے اورتمام اقوام کو تحمل، انصاف اور بامعنی سفارت کاری کے لیے کردارادا کرنا ہوگا۔انہوں نے زور دیا کہ اسرائیلی جارحیت کے خلاف عالمی سطح پر موثر اور متحد ردعمل وقت کی اہم ضرورت ہے تاکہ مشرق وسطیٰ میں قیام امن ممکن بنایا جا سکے۔